Gis de sèisse per la Rèino di cabrian asiati

Fin-qu’aro lou mounde assajavo de leca lou cabrian dei pato jauno, o asiati, e l’escoumesso èro de pas lesca lis àutris insèite, en particulié l’abiho. Alor falié pausa li lèco à-n-uno pichouno periodo, en febrié, aquelo ounte la rèino es en camin per rejougne soun nis. Eficacita aleatòri…

Mai aro vaqui que l’Universita de Tours (Istitut de recerco bioulougico sus l’insèite) e l’Acadèmi di Sciènci de Chino, trabaiant ajustadamen ,an trouba la lèco seissualo perfèto : l’escoumesso aro es d’atriva li mascle emé l’óudour de la rèino, per li lesca. Em’acò serié pèr manco de reproudutour que li Rèino, paureto ! serien sènso prougenituro. De vèire coumo marcho l’autoun venènt, sasoun de la reprouducioun pèr éli.

L’estùdi siguè publica dins la revisto d’entoumoulogìo Entomologia Generalis.

« Em’acò esperan de redusi lou noumbre de mascle, e coume acò aquéu dei nis » que dis Eric Darrouzet, lou cercaire tourangèu afilia au CNRS. Vespa velutina nigrithorax envahis lou territòri francés aro despièi quasi dos decenìo, à cha pau s’es espandi despièi 2004 e lou Lengadò, e poudèn lista la tiero de sis ourtoulan : pounchouno mai facilamen que son cousin euroupen ; galavard se gavo emé touto meno d’insèite, e mai que tout nostis abiho. Es un desastre per la bioudiversita. E en Franço es a peno se Lion e l’Alsaço li escapon encaro.