Ors e lop sus la grasilha

Au mitan de l’estiu la Federacion Nacionala Ovina, part dau sindicat agricòle FNSEA a publicat una chifra : « lei perdas de fedas chasque an son estimadas de 900 a 1000 bèstias per causas d’atacas d’ors ». Segons l’organisacion professionala – que citava l’Ofici Francés de la Biodiversitat – entre janvier e octòbre 2022, 937 fedas serián estadas tuadas per l’ors. Pasmens l’OFB ne’n aviá comptat « ren que » 590, ce qu’es pas ren.

De l’autre costat dau país occitan, ara lo lop es sus la grasilha… l’ivèrn passat un elegit locau varés a degut s’acarar an una loba que l’amenaçava. Amb una cotèla per desbartassar l’auriá cochada. En 2017 a Seina-deis-Aups, un joine alertat de nuech per sei vacas bramantas, aviá vist leis uelhs brilhants dins la nuech se precipitar sus eu. Aviá fach fuec dau fusieu per faire fugir lei bèstias.

En 2021, 3359 atacas recensadas aurián tuat 10 163 fedas segons la Direccion Regionala de l’Environament, de l’Agençament e dau Territòri (Dreal). Mai que tot es l’auça d’aqueleis atacas que fa l’ànsia dau monde dei norriguiers. Amb aquò entre 2010 e 2021 leis autoritats an comptat un triplament. Es que de 142 lops recensats en 2010, siam passats a 1096 en 2021 en França.

Amb aquò lo govèrn a adoptat un novèu Plan Lop lo 18 de setembre passat : ara seriá possible, amb aqueu, de tuar fins qu'a 19% de l'efectiu de lops en França, es a dire mai o mens 200 bèstias, subretot a la prima, per limitar leis atacas d'estiu en montanha. 

Mai lo lop es pas l'unic copable dei chaples de fedas, et lo biais d'indemnisar lei pastres entraïna de situacions perversas... que vos en direm mai dins la revista papier de novèmbre-decembre...

Nòstra enquista completa amé d'autrei chifras e de testimònis, serà de legir dins l'Aquò d'Aquí, revista que serà publicada au començament de novèmbre 2023