Lei troubadour, un remèdi soucietau de l’après Charlie ?

Entre jue de guerro e breviàri d’amour, li aurié uno draio pèr entèndre la necessàri alterita ‘mé la counvivènci ?
 
« Es ce qu’ai imagina per mei licean après lou chaple de Charlie Hebdo ». Deidié Maurell, proufessour d’oucitan lengo d’O entre Ais e Vitrolo, nous avié deja acoustuma à de proujèt que devien faire parteja d’idèio de respèt.
 
Em’uno adaptacien dóu Pouèmo dóu Rose, de Mistral, avié reüssi uno bello capitado en 2014, pèr dire lou mounde de touto la Mediterranèio quand va de coutrìo .
 
A l’ouro d’aro, vaqui que preparo, encaro emé sei licean dei mumei vilo, uno meno d’aiòli onte fau mountar de jue video emé la fabricacien d’un filme e de beloio de la literaturo troubadourenco.
 
« Tout acò es en trin de prene, mai es encaro dificile de n’en parla claramen » que nous dis. « Mai Pèire Béziers vèn au licèu sestian Cezanne pèr nous ajuda a trabaia lei dialogue de ce que sera un o de filme».
 
L’ome dóu Théâtre du Maquis avié deja adata la Cansoun de la Crousado. Mai es pas lou soulet pèr pourtar pèiro au mount-joio que bastis Deidié Maurell sus lou camin de l’intercoumprenesoun.


Au coumençamen, li a Isabelle Arvers, uno critico d’art marsiheso especialisado dins l’inmateriau, e lou desviramen de jue eleitrouni, que n’en fai pièi d’obro. « Per lou moumen, lei jouine s’amuson à l’ourdinatour dóu CDI ‘mé de jue de guerro, uno escabrouso draio pèr crea un mounde apaisa ! Pamens es acò que faran à parti de la destrucien ».
 

Viren d’esquino sus lou calendié… jusqu’au 7 de janvié 2015. « Lou chaple de Charlie Hebdo es la causo, segoun ieu, la mai grèvo qu’es arribado dins nouasto soucieta, au mens pèr ma generacien, en Franço. E un cop que m’a faugu n’en parla en classo, ai agu de licean aràbi fouaço integra pèr me dire que la colo d’aquéu journau l’avié bèn cerca… Autant dire qu’acò m’a fa chifra. »
 
Au proufessour, la cabussado dins l’obro literàri li a toujour permés de remounta à flour d’aigo ‘mé de respounso. De vèire emé lou Pouèmo dóu Rose, qu’èro remounta de l’obro de Mistral em’uno brassado de resoun de viéure ensèn, en counvivènci.
 
Estou cop, coumo un rabaiare d’espoungo que cabusso prefound, nous a remounta lou Breviari d’Amor, de Matfre Ermengaud, e sei 36 000 vers « que parlon, à la fin dóu siècle trege, dei couneissènço d’aquéu tèms ».
 
« Dei 24 eisemplàri que n’avèn garda, un soulet s’acabo pèr un trata d’amour de la dono. Deis autre acò siguè escafa pèr uno Gleiso toujour à l’agachoun  ». La censuro es de tout tèms, e serié pas mau se lei liceans n’en prenien counsciènci.

Mai l’educacien à la Chivalarié d’Arnaud Guilhem de Marsan l’a remounta tambèn ; émé lou Sarrasin de la Cansoun de Rouland, que vòu empacha un coulègo de feni lou chivalié nafra  au noum dei principe de la Chivalarié ; o encaro lou papagai blasfematòri d’Arnaud de Carcassés…
 
De tout acò, se vei bèn, a un riche materiau qu’aro fau bèn agença. Em'aco, Deidié Maurell e sei licean sestian faran de filme pèr la cadeno internet YouTube.
 
« A Vitrolo, lou proujè s’endraio, e sera belèu diferènt » que dis. « Espèri que tout aquéu mounde que chifro toulerènci e alterita, liberta dóu blasfème e valour coumuno, partejara deman sus l’internet un biais de vèire e de viéure en demoucracìo que pertoucara d’àutrei jouine ei banlègo ».