partagerCantar breton a l’Eurovision ? Li pensatz pas non ?! Es un pauc ce qu’a pensat un economista convidat a la TV RMC lo 7 de març. Dins l’emission Estelle Midi, vaquí que Pierre Rondeau siguèt escabrós sus lo subjèct : « son de lengas localas que servan pas la renomada de la França » per dire que la França deuiá èstre representada per la lenga francesa, e pas mai.
S’agissiá de criticar la chausida dau grope Alvan & Ahez de cantar breton lo tròç Fulenn. Lo grope siguèt retengut per represntar la França lo dètz de mai a Turin, per la 66 enca Eurovision.
E lo cronicaire renaire de suggerir de crear puslèu un « localvision » per lei lengas regionalas, sus lo mòde de la galejada un pauc crespada.
Ce qu’ignorava es que aquela mena de concors ja existava, e exista !
E meme qu’una cantarèla occitana, Liza, li siguèt premiada, amb lo premi dau public, en Sueda en 2006, au Liet Lavlut, reservat justament ai lengas minoritaris. Aquela an lo concors se debanava a Ostersund, dins lo sud de la Laponia, e lo 14 d’octòbre d’aquel an, la cantarèla, tanben jornalista de l’emission Vaquí a France 3, avisada pas manco un mes avans, decidiguèt de li presentar la cançon Solèu Roge, amb un texte de l'escrivan Mathieu Poitavin.
Liza siguèt premiada bòrd qu’es sa cançon qu’aviá reçauput lo mai de SMS d’afogats per sa prestacion. Aqueu monde agachava lo concors a la TV suedesa, e mandava sei SMS segon l’interés qu’avian agut per chasque cançon.
Lien Lavlut se fa quasi chasque an despuei 2002… a part quora la ciutat organisatritz se desfaussa, ce qu’es arribat en 2007 quora Narbona li a renonciat, en 2013, mai tanben en 2015, 19 e 21…
Mai es de sotalinhar, per Pierre Rondeau que benlèu amb aquò serà pas tant ignorant, qu’un segond festivau concors de cançons en lengas minoritarias es organizat en Sardenha, Suns Sardinia ! … onte participava encara un còp Liza, aqueu de còp en 2015, per li cantar L’aucèu, un tròç jazzy coma saup lei cantar.
Question de valeurs