Lo festenau que totei esperàvan

Dins lo luenchen dos chivaus se brófan entre una vinhassa e un ermàs, que cochan lei moscas dau cap. Mai pròche, sota l’ombra d’un grand falabreguier , s’entende la declamacien de Rodin Kaufmann. Lo cantaire fa descubrir a una centena d’ afogats silenciós lei tròç de son Pantais Clus, lei tèxtes d’un CD qu’alestisse amé la paciéncia d’un gardian de fare. 

Sus lei cadieras lòngas rojas estampadas dau Cirdoc, lo monde escota. Seguiran Aurélia Lassaque, Maelle Dupon venguda dau Quebec, Cecília Chapduelh, e d’autres…amé lo Provençau Matieu Poitavin. De joines, la votz actuala de la poesia d’òc s’es donat rendètz vos lòng dau Vidorle, au vilatge de Salinèlas. Mai la pretenduda frontiera entre provençau e lengadocian aquí desvela ce qu’es en veritat :  la linha dau rescòntre, e dau partatge.

Lei Rescòntres de Salinèlas leis an vouguts l’editor Martin Paul, aqueu dei pichons libres preciós de l’Auceu Libre, e la poetessa Estello Ceccarini, que vèn de publicar en cò dau premier Li piado dóu matin. « Pau pensava de faire un salon deis editors de lenga d’òc, dau mume temps que ieu pensavi d’acampar lei poetas de la generacien dei Rodin Kaufmann, Silvan Chabaud e Aurélia Lassaque. L’afaire s’es endralhat avans Novè e nos siam laissats portar per nòstreis estrambòrds , per recampar editors e poetas ».
 
Lo sosten crosat dau Cirdoc e de la Regien Occitanie son ganhats sensa mau ; « nos esperàvan, esperàvon que quauqu’un va prepausèsse ! » e en pas manca sièis mes lo premier festenau literari panoccitan naissiá, menat lèu mai amé rejonch.

 

D’un costat leis organisators demàndan la preséncia de monde ja assetat dins la poesia d’òc. Un Jacques Temple, un Joan-Claudi Forêt, un Joan-Ive Casanòva e quàuqueis autres l’i vènon. D’un autre costat l’ escomessa es de presentar la nòva generacien, aquela que galèra am’un gròs talent. Aquélei que fan petar lei frontieras entre leis arts : Aurélia Lassaque canta et parla, Cecília Chapduelh juèga, Matieu Peitavin enlaça sei paraulas ai fòtos de Stephane Barbier…
 
Dins una taula redonda sus la creacien d’òc de vuèi, l’elegit Patrick Roux se planhe d’una penuria de tèxtes, d’escrichs, que deman n’en patirà tota la cançon d’òc. « Un Marti, un Mans de Breish escrivián, ara, càntan ce qu’an escrich lei grands autors d’aièr ». Mai Marie-Jeanne Verny, ara joina retirada de l’Universitat Pau Valery de Montpelhier li remoca qu’a ja format una bòna part dei poetas de trenta ans que vènon a Salinèlas mostrar que, òc, sàbon crear dins lo tèxte.
 
Tótei proporciens gardadas, li a dètz d’aquélei joines geniaus, entre élei Maelle Dupon, venguda dau Quebec onte prepara dins lo silenci benlèu un nòu brulòt d’après La color lenta de la plueja.  Dins aquò leis editors fan un trabalh de seleccien sensa feblessa. L’Auceu Libre a une tièra d’espèra de dètz obratges e Joan-Pau Creissac ditz coma Jorn laissa pas passar de causas que podrián pas tenir la qualitat, mai ditz tanben qu’es un monde d’òmes, e que deuriá cambiar sei besicles per agachar d’un autre biais l’escrich dei fremas.

Mume s’es jamai dich, l’absenta d’aquélei rescòntres, es la frema editritz. La poesia d’òc, la literatura d’òc necessítan de fremas a la plaça onte se fan lei chausidas. Marie-Jeanne Verny, amé la complicitat dau Còrse Paganelli, n’en a tengut mai compte amé la publicacien de Par tous les chemins (legir Aquò d’Aquí 316), una antologia dei votz poeticas de lengas minoritàrias onte justament làissan pas de costat lo biais de dire dei dònas.
 
D’aquélei Rescòntres, lei premiers, podèm encara dire qu’an sachut faire fèsta. Convidar lo grope Mauresca Fracàs Dub a bailejar lo concèrt de la nuèch èra una idèa flama, qu’a atrivat a Salinèlas tot plen de monde per un momentàs de gaug, clavat per una farandola memorabla.
 
Nos mancava aquel « avans estiu » onte podèm ja pausar lei gràndei questiens de l’avenir de la literatura d’òc dins un monde que perde sei locutors, mai que ganha d’ afogats e de talents conscients de l’urgéncia de sauvar la diversitat.

Alora, un segond rescòntre en 2020 ?

Avec les suggestions lexicales de Reinat Toscano