pòrte dubèrte dau sabta au licèu : presentar la lenga per o gran público

Chasque an mai o mens leis establiments escolaris fan una "Jornada pòrtas dubertas". Per lo monde ensenhaire en occitan e sei sostens, es lo moment de se mobilizar, butar a la ròda, coma l'aviá fa l'ancian cònse de La Sanha-de-Mar, Bernat Vuillemot au licèu de sa ciutat, per assajar d'un biais oficiau de li faire tornar lo cors de lenga regionala despareissut d'annadas aperavans.

Segur, a minima es l'ora d' entre-senhar lei gens d'escolans, bòrd qu'en generau l'administracion farà pas grand causa per la comunicacion d'aquela matèria... quand descoratjan pas lo monde de s'i marcar.

Am'aquò saludam au contrari lo monde dau licèun mentonasc Curie, onte lo professor, Laurenç Revest, a tengut una taula e poscut reçaupre totei aquelei que volián ne'n saupre mai.

Vaquí que se rementa dau contacte qu'a poscut aver dins leis annadas precedentas. Segur de monde l'a mespresat, e segur encara mai que d'un vòlon d'un biais obsessionau d'anglés e pas mai... 

Mai, vaquí per lo positiu !



 

"De parentes an poshut venir tanben. Esperant de parlar au professor d’anglés o castelhan, pausar de questions, interès sus o fons, orari, coeficient, contraròtle continú e devers a casa o nan. Car dir qu’occitan en LVC damb un coeficient que passa a quatre l’annaia que ven en Terminala, poe donar d’arguments per motivar a s’inscríver a l’opcion. E far quasi regretar d’unu que l’informacian non èra encara arribaia fint ae soe aurelhe. A mai o professor fague a viraia de cada classa de cada collègi e licèu en fen d’annaia per presentar l’occitan. 
 
Dintre e bèle susprese, un parent de collegian a decidit de donar un nom de produch alimentari en mentonasc e a demandat conselh de scritura e de prononciacian au professor Sénher Revèst. 
 
Una maire de collegian que se descuerbe occitana vist qu’es originària de Bordèu e qu’a sposat un mentonasc. 
 
L’ocasian de veire qu’es un rare professor qu’un scolaro poe aver d’a 6a fint a la Terminala. Una persona conoissua quora tot es nòu au licèu. 
 
E de segur de liceans an vengut per presentar e diferente matèrie coma l’opcian occitan. De segur. Se totpien de mondo van primíer s’entressenhar per ‘e lengue grane’, l’occitan avia totun a soa piaça. 
 
Dos liceans de Primiera an ajuat a presentar l’ensenhament. De liceans a collegians, o messatge passa damb u mòtes de joes. "

Coma lo Laurenç Revest, bravei professors d'occitan, trantalhatz pas una minuta, digatz nos vòstrei testimònis, d'un biais que pòsque servir a d'autrei collègas. Tras que facile de leis escriure e mandar a Aquò d'Aquí !