Var : ça Varie mais c'est l'aVarie démocratique

Aviam 7 deputats dins Var, dempuei lo 17 de junh n'avèm 8. Uech de l'UMP elegits mé leser contra un vò doeis adversaris. Lo FN faguèt 40 dau cent, un pauc mai un pauc mens, au segond torn. Dins de burèus faguèt quiti me la drecha dicha classica, tot aquò sensa estèla nacionala dins sa tiera de candidats. Dins ma circonscripcien, la cinquena, lo cònse UMP de Sant Rafèu aguèt 59,4% contra 40,6 au FN qu'avieu jamai ausit son nom avans.

"Ai, Tolon e Provença e la terra d'Argensa…. qu t'a vist e ti vei" podèm dire en seguissent lei petadas dau trobador.

Lo Var siguèt en 1851 lo despartament qu'aguèt lo mai de patriòtas per si levar contra lo còup d'estat d'aquel arleri de Louis Napoléon. Lo Var siguèt li a un pauc mai de cent ans lo mai roge dei despartaments. A pròva, Clemenceau lo Vendean e d'autrei "roges" si faguèron parachutar a Draguinhan per èstre elegits au parlament. 

La sociologié dau luec basta per explicar la drechisacien. Lei riches e lei retirats aisats si fan ara cambeta per carrieras dei vilagis e dei ciutats. Convèn pasmens d'apondre que lei socialistas, quora èron encara au poder mé la casqueta SFIO, FGDS e PS, amolonèron lei cagadas. Oublidarai pas lo president dau Consèu Generau Soldani qu'avié permés a l'armada de s'agantar lei 36000 ectaras dau plan de Canjuers.