Terratremo

Lo 7 d'abriu a 21 h 27, un tròn de dieu puei tot tremola dins ma bastida. Sòrti pèr pas reçubre l'ostau sus lo suc. Es un terratremo pron fòrt. N'avieu viscut un pichinet aquì a Rocabruna dins leis anadas 50, puei un espetaclos en Turquia en julhet 67.

Avié fach de centenas de mòrts a Adapazari. Ieu èri a Bursa, sus l'autra riba de la mar de Marmara. Tot avié bolegat sensa tuar degun. Comenci de conoisse la musica e lei terratremos mi fan paur.

Aquèu diluns a 22 oras, preni leis infòs de France Inter per nen sacher mai, mai leis infòs an pas encara montat a Paris ; nen parlon pas.

Lo Miejorn es luenh. Puei sus BFM apreni que lo dich terratremo èra de manhituda 5,2 e que l'avèm sentit en Provença, Daufinat e Piemont.

 

Urosament, siam pas dins una zòna sismica, dison leis amenajaires, e podèm continuar de bastir que que siegue ente que siegue.

Avèm totei òublidat que de terratremo avien tuat de monde dins lo relarg de Niça e en Liguria avans 1900 puei a Lambesc en 1909.

Lei lèis de la natura duvon pas empachar lei lèis dau negoci.