
En mai que d’una taula, lo monde que voudrà venir a l’Ostau de Provença parlaràn de « l’identitat », de ce qu’acampa fin finala Occitans e Catalans. Sembla la tòca d’aquel assai que de reünir leis uns e leis autres. « Assajarèm de vèire se pita , lo monde, e se l’interèssa perseguirèm ! » contunha Josèp Delofeu.
Per aquò ocuparàn L’Ostau de Provença, au mitan dau Pargue Jourdan d’Ais. Lo Ceucle Català a convidat un savi pèr l’animacien dei gropes. Per aquò Salvador Milà vendrà de Barcelona. Aquel ex-òme politic siguèt conselhier catalan delegat a l’Urbanisme e a l’Ecologia de la Generalitat de Catalonha entre 2003 e 2009, puei deputat europeu sota l’etiqueta d’Iniciativa per Catalunya, deis ideas prò-eurò-comunistas. « Un òme d’experiéncia que li agrada l’idèa d’acampar lei culturas » ajusta Josèp Delofeu.
Un astre que la lenga occitana siegue oficiala en Catalonha

Tótei dos nos díson qu’es un astre que la lenga occitana siegue oficiala en Catalonha, en causa que se parla dins la Vau d’Aran. Un liame mai entre leis doás culturas, que ja sabián se parlar a travèrs la Copa Santa e mila eveniments dins l’istòria.
La turtelia se podriá pas concebre sensa l’aperitiu qu’afavorisa la discussien. Adonc lo monde es convidat a l’Ostau de Provença per lo dissabte 16 de març a partir de doás oras e mièja (8 avenguda Julles Ferry – o camin d’Occitània, per l’arribada finala)
Per cas d’entresenhas, podètz escriure au jornau aquodaqui@aquodaqui.info o au Cercle Català