Audiò-visuau

Sus Arte la polida Sophie nos fa descubrir lei pus bèus paisagis dau monde. Barrula deis Andas a Chipre, de Corsega en Tailanda emé son can, un dalmacian m'a semblat, pecaire es avugle. Leis avugles an mon respèt e ma simpatié, an tota sa plaça dins lei programas televisuaus levat bessai per nos faire vèire lo monde. 

Vendrà  lo jorn qu'un sord bailejarà leis emissiens musicalas per remplaçar Eve Ruggieri. N'i a que mi diran "siés retrò, siés reac, siés passeista, lo tèmps es vengut de capvirar lei règlas dins un monde de derisien".

Pèr lei responsables de Vaquí pus ges de besonh ara d'anar quèrre de bòns locutors dau provençau pèr si metre au nivèu deis animators de TF1, M6, D8...

Dimenche passat, un convidat de Frederi Soulié parlava de veituras m'una lenga qu'era ni francesa ni occitana. Aquò geinarà pus degun, laissem corre.
 
L'estèla creissènta dau Païsage audiovisuau francés es Cyril Hanouna que fa d'audièncis estrambordantas sus la modèsta cadena de la TNT D8. Ai agachat seis emissiens un parèu de còps e sieu estat estabosit davant la vulgaritat e la bestisa de son parlar e de son comportament. E pasmens parèisse qu'es tras qu'inteligent lo Cyril.
 
Dins leis annadas 50 e 60, èra lo contrari. Lei colhons volien passar per degordits. Léon Zitrone, l'estèla d'aqueu temps de la RTF, èra presènt d'en pertot.

Comentava tambèn lo hockey e lo patinagi artistique sènsa ren conoisse d'aqueleis espòrts. Parlava de "jolis sauts" estènt que sabié pas destriar lo salko, lo lutz e la boucle piquée. Seis entrevistas èron banalas; Zitrone era un cortisan dins una televisien au servici dau poder.
 
Convendrié de trovar una tresena draia pèr una televisien adulta e responsabla.

D'avugles nos farien aimar la musica e la leitura, de sords nos menarien corre en Patagonia, leis animators stars virarien l'esquina ai colhonadas pietadosas. Podèm esperar.