Abonatz vòstre CDI professor(a)s e sauvatz Aquò d’Aquí

Joan-Pau, professor d’occitan-lenga d’òc dins lo ròdol de Sant-Gaudens, li agradariá que seis escambis de liceans amé lei Balearas siguèsson valorisats ; a Sarà seis animacions ai collègis marselhés deurián èstre conoissudas de tota l’encontrada d’ensenhaires, e lei collègas la veirián amé mai de seriós…

E mai que d’un(a) vòu trabalhar en classa amé un o l’autre deis articles d’Aquò d’Aquí : “lei cortets que parlan siegue de societat, siegue de fèstas o de coina, perqué non, podèm lei veire ja amé d’escolans de cinquena. E per elei es mai vivènt qu’un classic...” que ditz una autra, dins l’Academiá de Niça.

Aquò d’Aquí au Centre de Documentacion CDI de vòstre collègi o licèu, amics ensenhaires, serà un biais per vosautres d’èstre vists coma mai seriós per tota la comunautat educativa. Serà tanben una ajuda dins vòstrei cors. Ja sabètz que l’i trobaretz tant de grafia mistralenca coma classica, tant l’i legiretz de provençau coma de lengadocian, de niçard o de vivarò-aupenc…

E per nòstra chorma, sempre en recerca dei mejans de subreviure per vos informar, sabètz coma seriá essenciau ? Se deman cinquanta professors demandan a son establiment un abonament au CDI, segur que se negarem pas !

Se vos plais, pensatz en aquò!

Fasètz una demanda a vòstre CDI…

Podèm vos mandar un exemplari a gratis, segur.

Grandmercé