partager
Cocanha ! lei Fons Estructuraus Europencs representaràn 322 miliards d’€uròs entre 2014 e 2020. Ailàs ! faudrà lei partejar entre 274 regions d’Euròpa. Doble ailàs ! Eron de 23,3 miliards entre 2007 e 2014 per la França ; mai son pus que 14,2 miliards per lei sèt ans de venir. Per leis Europencs, am’aquelei temps de crisi, es pusleu la dècha.
Adonc es au moment que descrèisson aquelei fons, que l’Estat lei laissa ai Regions. Es tanben a l’ora de lei regionalisar que l’Euròpa concentra sei critèris.
« Au vòstre 80% d’aquelei fons seràn consacrats ai finançaments de projècts de recèrca, d’innovacion et per luchar còntra lo chanjament climatic » que ditz a Brussèlas Pèire-Emmanuel Leclerc, fonccionari de la Direccion Generala de la Politica Regionala, a la Comission Europenca.
Chanjament de règlas : la recèrca rabalha la mesa
« Totei leis ajudas per lo desvolopament economic dei país, elei, desparèisson ! » rebeca Bernat Molling, lo premier cònsol d’una comuna de Provença Auta, pròcha de Castelana.
Levat dau numeric e dei laboratòris, l’Euròpa pagarà plus, coma l’aviá fach, per l’aparament dei bòscs, o per estudiar coma endraiar un projèct d’agrò-torisme…
A Brussèlas, nòstre fonccionàri manda au latz ; « a carga dei Regions de crear un guinchet unic per rendre aisats lei dorsiers ».
Dejà, a la fin de febrier, Provença Aups e Còsta d’Azur aviá mandat dins lei grandei linhas ce que voliá afavorisar ; la Comission respondrà, e a la fin de 2014, saubrem quntei projècts seràn ajudats.
« Siam pas nosautres que seleccionam, levat dei projèts de mai de 50 M€ » ajusta PE Leclerc. E n’i aurà pas fòrça au nòstre.
Sabèm qu’aquelei, n’i aurà pas fòrça : una « ciutat deis entreprenèires » que carreja lo Pòle de Competitivitat Cap Energies, a Cadaracha ; puei lo reviscolament dau trin dei pinhas, accidentat fa pauc, e que reclama de chantiers d’urgènci que podrián decidar l’Euròpa de lei pagar lèu.
Mai d’un milliard europenc per la Provença
A Marselha, la Region Paca assaja de se metre bòn per alestir sa politica regionala. Fin qu’ara èran lei fonccionaris d’Estat qu’alestissián tot.
« Lei transferiments de personaus a la Region se faràn a chapauc, que devon encara plegar totei lei dorsiers d’ajuda de 2007 a 2013 a la Prefectura », nos ditz Patric Allemand, lo delegat regionau ais Afaires Europencs.
E d’aquela passa negocián amé la Commission Europenca. Patric Allemand, eu, pènsa que lei fons esctructuraus son pas tant en baissa qu’aquò.
« Entre lei Fons de Desvolopament Regionaus (Feder), lei Fons per l’agricultura e lo desvolopament rurau (Feader), qu’elei creissaràn, e lo Fons Sociau Europenc, la Provença aurà mai d’un miliard, e sièis programas de cooperacion internacionala seràn ajudats ».
Mai li a de règlas. 80% dei 286 M€ de Feder pagaràn de recèrca-innovacion e de Tecnologias de l’Informacion e Comunicacion.
E lei Feader, que Bernat Molling auriá ben vists pagar lo reviscolament de monuments d’arquitectura rurala, son pusleu fachs per mai cubrir la region d’un malhum numeric.
Leis assembladas localas auràn pas l’astre de bailejar sens la Region
Mai, regionalisacion o non, es pas lei « pichons » que decidaràn. Es lo Consèu Regionau que tèn la poténcia ; es eu l’interlocutor de l’Euròpa.
« De tot biais, lei Consèus Generaus son pas otilhats per alestir l’afaire e aparar sei projècts a l’Union Europenca » que nos ditz Patric Allemand.
Aquò dich, alòr que son pas encara creadas oficialament, lei Metropòlis de Niça, Tolon, e Marselha, an aprochat directament lei servicis de la Comission Europenca, que lei recebe, sens tròp s’engatjar
Per lo premier còp en França, am’aquelei fons europencs, es lei Regions qu’auràn lo leadership. Fin qu’ara, lo baile èra pusleu lo Despartament, qu’aviá pron de budget.
Un signe que lei Regions francesas s’apròchan d’un estandard europenc, coma lei Provincias d’Espanha o lei Länder alemands, que pòdon tutejar l’Estat au sieu ?
Mai es qu’aquela regionalisacion deu se tradurre per un novèu centralisme, eu regionau ?
Prouvenço Nacioun vòu presentar de candidats