Les pieds tanqués o lo passat per dire lo present provençau

De teatre que va pas sistematicament sus una scèna… de teatre, e que vos parla de l’istòria de Provença a travèrs son actualitat, es aquò que prepausa la companhia Artsenicum. Sa pèça Les pieds tanqués, serà jogada dins l’anfiteatre de la Ciutat dau Libre d’Ais lo 26 de novèmbre, puei lo 29 a Tolon, a l’Espaci Comedia.
 
« Eri un amator quand ai vòugut evocar l’insurreccien dei Republicans de 1851 » que nos ditz Felipe Chuyen. « Amé l’ajuda dau CG83 e d’amics, en 2001 avèm organisat de taulejadas republicanas, coma au mitan dau siècle XIX, monte leis uns cantavon lei cansons d’alòr, d’autres disián lei declaraciens que siguèron fachas per leis insurgents ».
 
Un còp sus la draia, aqueu trin s’es plus arrestat. « A chapauc siáu devengut professionau. En 2007 ai escrich « 1907 Batailles dans le Midi », que parlava de la revòuta dei vinhairons…e l’avèm jogat mai que d’un còp dins la rèire-cort dei cooperativas ! »

Adonc vaquí un teatre d’intervencien qu’es fach per dire lo monde nòstre amé sei contradicciens. Amé Les Pieds Tanqués, si trata de parlar de la descolonisacien e mai que tot dau trauma argerian. « Una còla de jogaires lança lei bòchas, e dau temps de la partida, un qu’es d’origina araba, l’autre qu’es fiu de pè nègre, e d’autres encara, nos van parlar d’aqueleis istòrias que nos son vengudas de l’Istòria, e que, trenta ans puei, semblavan totjorn tant dificilas a viure. »
 
Fau dire que la partida de petanca se debana au nòstre en 1995. Era una annada marcada per leis atemptats parisencs e lei victòrias dau FN dins mai que d’una vila provençala. Valent a dire que lo moment chausit es pas neutre.
 
A Artscenicum, li mancariá plus que la paraula, en òc. « Era pas ma tòca de faire un teatre per aparar la lenga, mai lo biais de parlar es ben d’aquí, coma un liame entre istòria, cultura e actualitat » qu’ajusta Felip Chuyen. « En veritat voliáu me faire plaser, seriosament ! En quinze ans es devengut un mestier, tant comedian coma autor ».

Aix en Provence, Amphithéâtre de la Cité du Livre : 26 novembre à 20h (Amphi de la Verrière - 8 Rue des Allumettes,13100 Aix-en-Provence entrée libre dans la limite des places disponibles Contact : 04 42 91 98 88)
Toulon, Espace Comedia : 29 novembre à 19h45, 1er décembre à 16h et 3 décembre à 20h45 (