A Tarragona units per reussir

Chasque dos ans la Tarraco Arena s’emplena de sèt a uech mila espectators dau temps que son pertèrra s’emplís, eu, de benlèu tres mila castellers que se destinguisson per son vèstit : lei Bordegassos de Vilanova e sa camisa jaunejanta, lei Minyons de Terrassa amé la verda, la Jove e lei Xiquets de Tarragona, locaus de l’etapa, amé diferentei nuanças dau ròse… Quina mosaïca ! 

Mai dos jorns avans, lo monde casteller locau s’èra acampat sota la glèisa de Tarragona per son ultím entraïnament… « Perdon ! mai nos agrada pas de ne’n parlar ansin, siam pas d’esportieus » me sotalinha Jordi Surinyach, lo cap de chorma  ; « ce que fèm ara es de renovelar un acte culturau màger dei Catalans, podètz comparar amé de teatre mai pas am’una competicien dins un estadi. Fèm un assai, pas un entraïnament ».
 

A chapauc , mans e braç tiblats , lo joine barbassut mòstra a cincanta balès, fremas compressas, coma devon se tenir en rega fins qu’au centre, onte s’auçaràn totara, quatre per quatre, leis castellers que montaràn uech nivèus. « Pensi qu’aqueu biais de s’unir entre totei per l’unica tòca d’afavorisar l’auça dau mai pichon es simbolic de nòstra societat catalana, obèrta e generosa » vòu ajustar Alba.

Aquela joina policiera en pòsta a Barcelona s’entòrna tre que pòu au sieu per participar an’aquelei messas laïcas onte tres a quatre cents personas pòrtan pèira de còps.

A Tarraco Arena, lo dimenge a miegjorn, alòr que lei castells se succedon a-de-rèng , aqueu biais d’èstre unitaris passa dau fach culturau a la demonstracien politica : una bandiera giganta se passa de mans en mans entre lo public per afiermar : « Fèm la República catalana », e dessota apareisserà lo president catalan Quim Torra, per un banh de mans sarradas. 

Notre dossier de six pages avec reportage complet, entretien avec une anthropologue, enquête sur ce phénomène culturel dans notre mensuel de novembre. Pour vous abonner c'est ici.