Pollucien silenciosa lo bòsc cremat a la premiera plaça

Lo brutlage dei residús de bòscs e, d’un biais generau, lo desvolopament de l’energia-bòsc en Provença serà deman lo factor principau de la pollucien de l’èr, segon Domenja Robin. Lo baile de l’associacien de susvelhança de l’èr Air PACA parlava lo 27 setembre, a Seteme (13), dins l’encastre d’una jornada scientifica sus lei residús d’alumini que remanda la societat Alteo, de Gardana.
 
Per dire mai qué es aquela pollucien dei residús solidas de baucita qu’Alteo espandís sus un terrenc, Manja Garrit , au mitan dei còlas de Gardana e Boc-Bèl-Air, Air PACA a pausat cinc captaires de produchs quimics, entre Manja Garrit e un site testimòni a quinge quilomètres.

A la suspresa de l’organisme, es aqueu, sus la comuna de Trets, qu’a enregistrat la mai granda pollucien quimica. Mai lei poussas de baucita li èran pas per grand causa. « Lei responsables ne’n son premier lei veituras de la via rapida e lei poussas de bòscs dei centenas de chaminèias d’ostaus que tractan pas sei fums » segon lo director d’Air PACA.

Son associacien vèn d’acabar una plega d’acamps publics per informar sus lo problèma dei brutlages de residús verds : brancas d’ esbucatge o de desbrossalhament. Enebidas sens autorisacien per un arrestat prefectorau despuei la fin 2013, son pasmens una pratica generala.
 
« Explican un brec de pollucien qu’avem mesurat en 2011 dins la valèia dau Palhon, au rèire país nissart. Aquelei poussas de bòscs li representavan alòr 45% per cent dau nivòl de pollucien que despassava lei valors limitas reglementàrias europencas dins lo relarg nissart »  confierma Patricia Lozano, d’Air PACA tanben.
 
 

L’Agència de l’Environament e de la Mestresa de l’Energia, en Provença, de son costat, a fa l’estatistica dei fogaus sens tractament de la regien. « Son 147 000 e representan d’autant mai un problèma que lo fenomèn es a créisser e que ges de reglementacien pòu, a l’ ora d’ara , moderar aquela pollucien » nos ditz un encargat de missien.
 
« Es un paradòxe », sotalinhava de son costat Ricard Hardouin, dau Collectiu Anti Maufasènças L2 de Marselha, dins un acamp d’informacien sestian fa una setmana : « mai se lei reglementaciens fan baissar lo nivèu de pollucien deis usinas e dei veituras, aquela dau bòsc cremat créissa sensa bruch per devenir un vertadier problèma de santat publica ».

Sens parlar deis incèndis de bòscs que, segur, faràn créisser l'estatistica dei polluciens en Provença per 2016.