Joan Ives Petit : « lo pièger seriá de ren faire dins lei transpòrts regionaus »

Son restrenchs e subretot desconeissuts, lei budgets « transpòrt » de Provença. Pasmens lançatz mai d’un projècte. Vos sembla rasonable ?
 
Fau ben veire que çò que finançam pas per melhorar l’ofèrta de transpòrt, lo pagarem d’un autre biais, amb lo budget de la santat per exemple. Se pòu pas imaginar de pas bolegar. Me pensi qu’avèm de doblar nòstra infraestructura ferroviària entre Marselha e la frontiera italiana. E tot parier entre Ais e Marselha. La congestionassa rotiera es fenomenala. Coneissi degun espaci urban qu’i escapa : ni Avinhon, nimai Marselha, Tolon… e Niça pas mai. Lo temps d’embarràs creisse totjorn que mai. Un trabalhaire que pren cada jorn l’autorota entre Ais e Marselha pèrde dètz jornadas entieras l’an dins aqueleis encombraments. Se calam, ne’n perdrà 17 en 2023, que preveson leis estudis. Leis alentiments au dintre de Marselha nos valon chasque jorn 35 000 oras. Amb tot aquò, l’esperança de vida es reducha de sèt mes e mieg a respècte de la França entiera. E se la pollucion es una realitat, lo creissement demografic n’es una autra. A l’entorn de 2030-40 serem un milion mai. Sabem ja que la totalitat deis infraestructuras qu’avèm solament encara en projèctes per Provença-Aups-Còsta d’Azur seràn alora saturadas. De pas bolegar, es impossible !
 
Aquò dich, sembla pas possible de laissar la Region pagar tota soleta. Lei budgets d’Estat per aquò ?
 
Respònde pas a nòstrei demandas, e sabèm pas s’aurà la capacitat de va faire. I a dins la França entiera una envolopa de 2 miliards d’èuros per lei novèleis infraestructuras. Se saup ja que serà pas pron per finançar totei lei projèctes que n’avèm de besonh. Una dei rasons es qu’aquelei 2 miliards podrián èstre consumats entierament per la linha de granda velocitat entre Lion e Turin. Aquesta capturarà lo quart dau budget europèu dau malhum de transpòrt europèu entre 2014 e 2020.

Se discutirà lèu lo contracte de plan entre Estat e Region. Auretz de projèctes prioritaris d’i veire ?
 
En veritat sabèm ren sus sa consisténcia, son perimètre amb la metropolizacion de Marselha, nimai son importància financiera. Benlèu que serà tant una mena d’inventari a la Prevert coma lo darrier. Benlèu que parlarem de prioritats. Sabèm pas manco se, deman, son baile serà pas lo Ministèri de l’Egalitat entre lei Territòris. Per ieu, trobariáu pas aquò illogic.
 
E lei vòstras, de prioritats ?
 
Son sèt. Perque siam lèsts per lei faire. Modernizar la linha entre Ais e Marselha, tornar durbir la linha entre Ronhac e Ais e la connectar a l’Aeropòrt e lo relarg d’activitat d’Eurocopter, qu’es màger. La linha Carnolas-Gardana e aquela entre Dinha e la Vau de Durença son lèstas d’èstre endraiadas. Tot parier per lo projècte transfrontalier Provença-Liguria. Volèm tanben menar un estudi per veire se Valença e Grenòble pòdon èstre jonchas a partir de l’estèla ferroviària de Veinas. Fau tanben aumentar la capacitat amb lo camin de fèrre de sortir dau Grand Pòrt Maritim de Marselha, e aumentar pereu leis autrei mejans de transpòrt a partir dau camin de fèrre. Pus luenh dins lo temps, volèm encara la pertusada ferroviària au Montgenèbre. Se tot aquò es dins lo contracte Estat-Region, serem pas en retard.

Mai auràn l’astre d’èstre retenguts totei ?
 
Siguem lucides subre lei capacitats financieras. Mai d’un autre latz, reconeissem qu’amb aqueu contracte de plan, avèm finalament mai obrat. Lei linhas Canas-Grassa, Avinhon-Carpentràs, la « virgula » d’Avinhon-TGV, la tresena via entre Antíbol e Canhas, aquela d’Aubanha a Marselha… Èra pas ren.
 
Amb lei Camins de Fèrre de Provença (lo trin dei Pinhas) avètz acabat de chantiers longàs au Nòrd de la linha. Mai que faretz dau costat de Niça ?
 
Un estudi per saber se podrián pas aumentar la cadéncia fins a quatre trins l’ora dins la partida inferiora de la linha, amb una connexion vèrs Var e lo pòl multimodau de l’aeropòrt de Niça Sant Agustin. De veire tanben se seriá pas possible de l’electrificar. Dins leis Aups trabalham amb mai d’un país e lo Conseu Generau deis Aups d’Auta Provença per saber coma la linha podriá ajudar a mantenir d’activitats. Volèm aumentar lo nombre de viatjaires e tenir nòstre ròtle de servici public de territòri.
 
Despuei lo 29 d’octòbre de 2012, la Region a représ la linha Dinha-Niça. Perqué ?
 
La convencion que nos liava ai Camins de Fèrre dau Sud de França (una filiala dau grop Veolia, ndlr) èra acabada. Aviam menat un estudi ; mòstra que l’apèu d’ofèrtas per una delegacion de servici public donariá pas vertadierament de concurréncia. En fach, i auriá pas agut pron de societats interessadas. E coma finançam nosautres 85% dau budget d’aquela linha dei recèptas pichonas, se siam dich que de mestrejar lo còst e d’adaptar l’ofèrta, èra mai aisat directament. Vaquí.