
La questien es pausada per la Linha Novèla Provença Aups Còsta d’Azur, la quala vèn de vèire durbir una concertacien publica que devriá pas servir a grand causa.
Aquò dich, fins qu’a decembre, lei ponchs de vista dau public pòdon èstre rebalhats a prepaus dei traçats que devon menar aquela rega ferroviària jusqu’à Niça, despuei Marselha, finalament.
Finalament ! Bòrd qu’aqueu projècte, qu’a solevat fòrça contestaciens a la mitat deis annadas 2000, passarà pas, finalament, per la plana dau Var. Aquí la viticultura n’en auriá patit, amé lei comunas ruralas onte s’amassan fòrça trabalhaires de l’industria d’auta tecnologia, e que li vòlon viure sensa que la SNCF l’i pòrte tòrt amé bruch e rotas copadas.
A cat escaudat l’aiga fresca l’esfraia

« Ai fach mon experiéncia fa onge ans » qu’a dich a la conferéncia de premsa que presentava lo projècte, a la fin de setembre a Marselha. Una experiéncia malurosa per eu e per son projècte d’ agençamentàs de la Plana de Var.
Mai li vòu crèire encara una briga, a doás condiciens : un cambiament politic que menariá, après mai de 2017 un governament segon son gost, e una taxa sus lei transpòrts entre Piemont e Provença que permetriá de pagar de lònga lei chantiers dau TGV e adonc de « mestrejar l’integracien environamentala d’aqueu projècte ». Segur que d’ecologistas veirián pas ben lei causas coma aquò.
Sensa decisien, l’especulacien fonsièra
Oficialament, es a dire segon SNCF Réseau, la linha fa vèire ren que d’avantatges, coma portar pèira a l’absorbiment de 30 miliens de desplaçaments de mai, esperats sus la riba de mar fins qu’en 2025, e que senon se farián per rota. Lei viatjaires n’en patirián, bòrd qu’entre Niça e Sofia Antipolis un trabalhaire que rotla perdriá, segon leis estudis SNCF, en 2025, 32 jorns l’an ren que per se desplaçar entre son ostau e son burèu.
Verai qu’en 1860, quand es arribat lo trin en Provença, aquela comptava tres còups mens d’abitants. Mai segur que per respondre au besonh de transpòrts au dintre de la Regien, lo TGV sembla pas tant adaptat. Es per aquò que SNCF Réseau comunica pereu sus un autre aspècte : lo TGV, rapide, raprochariá lei metropòlas provençalas que son Marselha, Tolon e Niça.
Un raprochament à 20 miliards, valent a dire que benlèu es un pantais que lei raprocharà per l’esperit, mai segurament que dins la realitat per lo ralh.