Una Provença dau malhum electric intelligent s’alestisse

« Una bèla escomessa qu’aqueu panorama de nòstre avenir electric » que pensa Cloé Pfeiffer. Alòr qu’escobava totei lei possibilitats de l’intelligéncia energetica de nòstre deman, la baila tecnica ajoncha d’ERDF Mediterranèa a donat son sentiment ai cònses dei Bocas-dau-Ròse venguts a Marselha se n’informar en julhet passat : « assajam plen de soluciens e, segur, li aurà leu de desbocats industriaus ».
 
Es que la Regien a depausat, en julhet, un projèct de candidatura a l’apèu a manifestacien d’interés de l’Estat sus lei «  malhums electrics intelligents ».
 
Es un dei 34 projècts industriaus qu’aviá mandat l’ancian menistre Arnaud Montebourg.
 
Dei sièis a sèt dorsiers de candidatura en França, la Provença aurà benlèu l’astre d’èstre chausida, bòrd que la Provença a quauqueis arguments per ganhar.
 
Es qu’es au nòstre qu’avèm vist se desplegar dos demonstrators d’aquelei possibilitats d’energia economa e connectada dins leis annadas passadas.

Premio, que s’èra espandit dins la comuna de Lambèsc, bailejat per lo pòle de competitivitat CapEnergies, aviá dejà, a partir de 2008, fa vèire que la « vila electrica intelligenta » podiá gerir lei desplaçaments, leis energias renovelablas e la mestresa de l’energia au meme còp.
 
E a partir de 2013, es pròche de Niça, a Carròs, que s’es espandit Nice Grid, per assajar de soluciens per pas pagar tant car lo malhum electric.

« L’investiment es gigantàs, e, s’arribam d’ escafar per partida l’energia que consomam, se podèm ne’n reservar una autra partida dins de batarias, aurem pas besonh de bastir de malhums tant despensiers » que nos ditz Jan-Cristòu Delvallet, lo director dau desvolopament d’ERDF que mèna aqueu projèct.
 
Aquelei braveis escomessas an posicionat la Provença coma un territòri en poncha dins aqueu domèni dei smart grids.
 
« Mai am’ una Provença onte comptam la mar, la montanha, de ciutadassas e de terraires ruraus amé quasi degun, de relargs richàs aquí e paures ailà, es lo territòri meme que pòu interessar lo ministèri de l’Economia per sa diversitat de condiciens e de besonhs d’energias» qu’ajusta Cloé Pfeiffer. 

A la fin de l’annada, sauprem cu ganharà l’apèu. Pasmens, maugrat sei qualitats evidentas, la Provença serà chausida que se seis actors politics e scientifics vòlon bèn se mobilisar. « La diferéncia entre lei candidats serà sa capacitat de defendre un projèct onte », nos ditz una fònt pròcha dau dorsier, « fau premier saupre presentar una vertadiera filiera industriala onte trobaretz tant d’entrepressas chanudas coma d’ofèrtas de formacien ».
 
En Provença, lo pòle de competitivitat CapEnergies, mai tanben aqueu sus lei Soluciens Comunicantas Seguresadas fa espelir de desenas d’aquelei start up clafidas d’ingeniors pron engaubiats
 
Mancariá que de va faire sacher. Serà lo ròtle dau Consèu Regionau. Per lo moment a ren comunicat. Fau esperar que se revelharà leu, maugrat la periòda electorala que se duèrbe, bòrd qu’es eu que presenta la candidature, alestida en pratica per CapEnergies.