Lei Provençaus renforçan l'amistat amé lei Catalans

Lo disabte 18 de mai venènt lo Forum d'Oc acamparà sa Convencion a-s-Ais, per, entr'autrei questions, chifrar coma renforçat lei liames amé lei fraires Catalans. "Lei dos an de se parlar e de se conéisser mai, vèire lei causas comunas dins la cultura" ditz Alan Barthélemy-Vigouroux, lo secretari dau Forum.

L'associacion acampa leis ...associacions : per anar de cotria trobar leis entrepresas e lei collectivitats que vòudrián faire intrar la lenga nòstra dins sa politica. Ara fòrta de centenats de sòcis, coma per exemple un club de speleò dau Var, lo Forum d'Oc assaja de s'inspirar deis exemples catalans, bòrd qu'elei an reussits a reviscolar la lenga dins l'espaci public coma dins la societat.

Aquela convencion serà seguida per un collòqui universitàri sus "Provença e País Catalans, agachs crosats" entre lo 10 e lo 12 d'octòbre, totjorn a s'Ais.

D'autreis iniciativas creban l'uòu , coma am'una còla d'individus afogats de la cultura catalana, que crearàn lèu un Cercle d'Agermament Occitanó Català (Ceucle d'afrairament occitanò-catalan) en Provença. 

Ne'n an fa la crida lo 10 d'abriu a s'Ais encara un còp, au destapat d'un acamp public per presentar doas vidèòs a l'assisténcia, sobre la societat catalana. Après un debat prepausat per nòstre jornau amé lo Cep d'Oc, a l'Ostau de Provença d'Ais, l'anoncia siguèt facha en acòrd amé lo Centre Caoc, que ja exista a Barcelona.

Fa seguida an una "turtelia" (un acamp entre ciutadans per charrar de l'actualitat), organisada fa pauc au mume luec, per lo Centre Català de Marselha.

Aquesta convergència d'iniciativas deuriá afortir lèu la relacion entre lei doas culturas, e favorisar un sentiment de faire societat solidaria d'entre Cuneo e Elx.