
Sus lo tarmac dau domèni dau Planet, en plen mitan d’un luec enviròutat de còlas boscosas, aviá acampat setge societats, la mai dau temps pichonas, que concebon aquelei maquinas. De lei vèire adarré expausadas, se podriam crèire dins lo setenc filme de la Guèrra deis Estèlas.
Un elicoptère Bertin vesina am’una mena de socopa volanta roja, pròche d’una reproduccien d’Airbus. Tot aquò es clafit d’electronica embarcada. E aquò interessa fòrça lei representants de mai que d’un Servici de Secors (Sdis), que son venguts per apreciar son utilitat.
Intrar dins un ostau qu’amenaça de s’ aboseirar , au mitan d’una centrala nucleara, dins l’obrador clafit de gas d’un petroquimista, o per cercar un negadís au trefons d’una aiga fangosa, vaquí lo ventalh dei possibilitats d’aquelei engenhs que pòdon remplaçar leis uelhs e leis aurelhas d’un pompier que riscariá plus sa vida.
Applications militaires d'abord

Se pòu segur emplegar per trobar una persona negada, coma un tresòr antique sota la mar… o lei bidons de produchs toxiques mandats au fons de la mar per lo capitani pauc escrupulós d’un cargò… Enfin, pòu tanben inspectar una restanca idroelectrica « en quauqueis oras, en plaça de dos jorns am’un sota-marin » assegura M. Dubourg. Mens de temps, mens car…
Mai es l’armada que paga fòrça a l’ora d’ara la recèrca e lo desvelopament d’aquelei juguets. L’exèmple de Novadem, una start-up que rèsta a Meiruelh, pròche das Ais, resuma bèn la draia d’aqueleis entrepressas.
Creada en 2006 per dos joines afogats d’aeromodelisme, Pascau Zunino e Fabien Paganucci, la societat a embauchat uech personas l’an passat, alòr que fa pas manco cent mila €uròs de chifra d’afaires. Fons d’amorsatge de la Comunautaut dau Païs Sestian, Encubator d’entrepressas Impulse, Agènci de l’inovacien Oséo… l’argent tomba dins l’escarcèla, fins que la Direccien Generala de l’Armament sostengue la societat.
Segur que li a un marcat militari per aquelei modèles reduchs. Se ditz a l’ora d’ara qu’es un dròne militari qu’auriá destruch lo convòi de fugida de Khadafi, fa un an. E qu’un autre, menat per lo Hezbollah, auriá espinchat lo desplaçament, a Beirot, dau capolier dei Rensenhaments libanés, tuat dins un atemptat la setmana passada. Israël tua mai que d’un responsable palestininian am’aqueleis engenhs que, d’un còp, apareisson pas tant simpatiques.
Un centre d'essai en vol à Pourrières

L’anciana basa militària de Selon s’es especialisada e acuelhe d’entrepressas dau sector. Lo Centre d’assais en vòu d’Istre tanben s’implica am’un novèu simulator en vòu, que li dison « Moissau » e que calcula l’estirada dei drònes fin qu’a sa tòca, amé l’ajuda d’avions militaris.
Ara es la comuna de Porriera, dins lo Var, que vòu crear un Centre d’Assais e d’Estudis per Modèles Autonòmes (Cema), per acampar leis entrepressas, un pauc tròp escampilhadas, d’aquela filiera en Provença. Lo projèt a lo sostèn dau premier cònsol, Sebastian Bourlin.
A l’ajuda d’aqueu projèt, una reglamentacien novèla en França. Permete despuei lo mes de mai de faire volar lei drònes civils dins d’endrechs vueges de monde, dau moment que siegon en vista de son conductor.