Lo bèl estiu de Renat Sette

L’artista provençau aviá ben encapat l’espectacle Balat, evocacien filmica e cantada de Les Temps Passats, l’òbra de Joan-Ives Roier. Après lo succès de la premièra, a Forcauquier, pasmens, siguèt plus jogat enluec …jusqu’à la setmana passada a l’Estivada de Rodès, onte 150 personas l’an presat lo 21 de julhet. « E lo Chantier de Correns m’avisa ara que serà donat ai Targas de l’an que ven ! » que nos ditz lo cantaire. Una data de reservar au cartabèu, adonc, en junh de 2017.
 
E, amé son espectacle Amada, es anat en Sardenha lei premiers tres jorns de julhet, au Festivau de Vulcani, au Musèu Arqueologic de Sassari e a la Casa Garibaldi de l’Illa de Caprera.
 
Pasmens tot se debana pas totjorn ben, e la data per son espectacle Amada, en quatuor, es anullada lo 27 a Vença. Deviá se donar a la mediatèca de la ciutat, mai l’agressien subida per una emplegada d’aquela estructura a provocat l’anullacien de son program festiu. Pecat ! que siguèt tambèn previst un bufet per aquela serada a gratis.

Aquò dich, lo 28 es a Quinson (04) a 17h30 qu’una passejada-concèrt serà ben accompanhada per lo public sus lei ribas de Verdon…o dins l’aiga amé de barcas. Còsta 15€ (reservar au 06 07 64 22). A Banon puei, a la Glèisa auta, Amada se farà ausir (6 e 12€).
 
Mai entre lei doás, podrètz anar ai Baumas de Venècia (84) l’escotar, lo 29, a 21h Capèla Nòstra Dòna d’Aubuna (8 e 13€).
 
Renat Sette, que canta tambèn solet a capella, e parla de son ancian mestier (manejava la tibla e cantava ren que per lei pèiras avans que de montar sus lo pontin) dins de conferéncias de tria. Va podrètz verificar lo dimenge 14 d’avost au Vernet (04) a 18h (« Calades et pierres sèches »), o encara lo 19 pèr Visite en Scène, au Bausset (84)a 21h plaça dau Marqués, onte serà amé la Companhia Le Souffle (reservar au 04 90 067 69 21, còsta 3 o 6€).
 
Solet o ben acompanhat, Renat Sette farà clantir sa votz tot l’estiu. 

Article écrit avec les suggestions lexicales de Reinat Toscano.