La nèu lèu evaporada chanjarà pas la situacion de manca d’aiga

Una nevejada aurà cubèrt la màger part deis Aups, entre autres lo Champsaur, l’Ubaia e lo Buech onte Vaïna, en plena creacion d’esplecha agricòla, s’es exclamada : « mancava plus qu’aquò ! » avans que de nos anonciar qu’èra ja fonduda dins l’après-miegjorn, la nèu.

« Es pas un fenomèn tant rar la nèu d’abriu, e mon grand m’a parlat mai que d’un còp de casudas mume sus leis auturas, a Manòsca ; l’èr fresc dau nòrd d’Euròpa rescòntra l’èr caud d’abriu que remonta despuei la Mediterranèia, e lo rescòntre es un tuèrt climatic que fa tombar plueja coma dins Var amé de gròssas chavanas , o de nèu coma dins leis Aups uei ». Per Cristòu Adon, responsable de l’Ostau de la Meteò e dau Climat deis Aups dau Sud (Leis Òrres), aquela nevejada aurà ges de consequéncias… ailàs !
 
Es que lo manca de plueja e de nèu de tot l’ivèrn se fa ben sentir, e la nèu tombada « mume pas serà intrada dins la tèrra en montanha. Se serà pas mai qu’evaporada en quauqueis oras. Per compensar l’enòrma secaressa que suportam ne’n faudriá ben mai ».
 
Verai que despuei la fin 2018 la Provença coma leis Aups an plus vist la plueja tombar. La nèu es rara, e per exemple lo mes de febrier 2019 èra lo mai ensolelhat despuei 1947, data dei premiers relevats d’ensolelhament.
 
 

Lei consequéncias son pasmens pas tant grèvas que l’an passat, quand encara una bòna part dei centralas nuclearas èran en pausa per verificacions. « A pas fach tant freg aquel ivèrn, alòr l’EDF a pas tant tirat sus lo lac de Serre-Ponçon » lo laus resèrva d’aiga de tota la Provença.
 
Aièr dijòus 4 d’abriu, la nèu èra tombada fins qu’a Champtercier, pròche de Dinha, ciutat qu’a vist sei còlas pròchas cubèrtas de blanc per quauqueis oras pas mai.