L’uman e la bèstia de cotria per l’Universitat Occitana d’Estiu

Es pas de crèire coma lo monde l’i vòu crèire ! L’epidemia que perseguis, la menaça d’un acantonament mai, lei restriccions… e pasmens leis afogats de l’animacion dau monde occitan se levan lo maffre per prepausar d’oportunitats de rescòntres !

Lo mes passat èra Pau Martin, l’editor de l’Aucèu Libre, que nos avisiá dau reviure dei Rescòntres de Salinelas, per lo mes de junh venènt.
 

Aièr èra la chorma de l’Universitat Occitana d’Estiu que nos disiá coma aculharà un còp de mai lo centre diocesan, coma aquelei ultimeis annadas, franc dau desastrós 2020.

“Siam conscients que l’occitanisme deu èstre au diapason de la societat, preocupat de la nòstra coma de l’universau” nos vèn Patric Lapèire, l’un deis organisators de la Marpoc. Per aquò l’UOE s’es chausit un tèma societau dei mai fòrts, lo rapòrt en evolucion entre l’uman e lei bèstias.

Creat per Robèrt Lafont amé tota una còla l’UOE celebra sa quarantacinquenca edicion, dau 10 au 13 de julhet, se lo govèrn nos confina pas un còp de mai.

E se totei lei conferenciers seràn pas occitanofònes, ren enebis lo public de questionar e debatre dins la lenga. L’UOE a vòugut premier acampar un fum d’especialistas per aquele Universitat qu’a sempre chausit un biais chanut de faire viure l’occitanisme.

A part leis atalhiers de lenga qu’assegurarà chasque jorn lo professor Matieu Poitavin, e lei dirèctes de chasque miegjorn de Radiò Lengadòc, aurèm d’efècte de belei taulas redondas.

Per exemple amé Marie-Lucy Dumas, una istoriana dei Cevenas, per nos parlar deis “bèstias Rèi” a l’edat mejan, o encara l’etnològue Jean-Noël Pelen per tractar dau rapòrt entre lei societats ruralas tradicionalas e lo sauvatge. Parlam pereu de la taula redonda sus lo tèma deis animaus dins l’imaginari occitan, amé la comediana Perrine Alranq, la Federacion Totemic e l’ensenhaire Benoît Combet. O encara l’autre taula redonda sus la bèstia e lo païsan (aviam jamai ausit parlat dau canard dei risieras !)

Segur après lo biais de chifrar , plaça ai vespres animats siegue per lo ciné, (L’heure des loups, de Marc Khane), siegue per un concèrt que farà de ben après mai d’un an d’anorexia musicala : Delphine Aguilera et Loucia Aguilera, Corne d’Aur’Oc (Brassens cantat en lenga), Canto Lou…

Adonc, chifrar e s’espacejar durant aquelei tres jorns de julhet, après tant de frustracions, farà de ben a totei. Oblidatz pas de vos manifestar pròche leis organisators, un còp vists programa ( chanut ) e prètz (pichons).