L’Opèra de Tolon entre Haendel e Offenbach

L’Opèra de Tolon ven de far conéisser son programa per la sason de venir. Produrrà Lakmé, de Delibes (en octòbre), que serà totjorn malaisat de faire oblidar l’èr famós dei Campanetas coma lo cantava Mady Mesplé.  Giuliano Carella bailejarà l’ Orquèstra de Tolon amé sei còrs.
 
Anna Bolena de Donizetti seguirà en novembre, encara amé lo meme Giulano Carella, mes en scena per Maria Loísa Bischofberger.
 
La Belle Hélène d’Offenbach puei ai Calendas, amé lo baile d’orquèstra Nicolas Krüger e la mesa en scena de Bernat Pisani. Au nombre dei cantaires, fau citar Jan-Felip Corre e Karine Deshayes.
 
Katia Kabanova, de Janacek, serà prepausat en janvier, bailejat per Alexander Briger e mes en scena per Nadine Duffaut.
 
A la debuta de març, donarà Les contes d’Hoffmann, que Offenbach, finalament, serà pas oblidat dins aquela programacien. Lo capolier Emmanuel Plasson amé lo meteire en scena Nicola Berlofa n’en seràn lei bailes.
 
Lo mes d’après plaça au barròc amé Haendel, que son Jules César serà donat sota la direccien de Rinaldo Alessandrini, mes en scena per Frederic Andrau.
 
En Mai, leis audàcias vocalas de Simon Boccanegra se faràn clantir sota la direccien de Giuliano Carella, am’ una mesa en scena de Gèli Bouillon. Clavarà la sason 2014-15.

La sason filarmonica donarà d’òbras divèrsas, coma Bizet, Ravel, Beethoven, Dvorak o Peteris Vasks. Sotalinharem la vesprada dau 5 de decembre, que Sèrgi Baudo bailejarà un programa onte seràn prepausats Toru Takemitsu, Beethoven (lo concertò per piano n° 5 « L’emperor » am’Alexandre Tharaud), Ravel e Stravinsky.

Lo pianista se presenta pus. E lo capolhier, ciotadenc, es un qu’a donat una color particulara a la musica francesa dau siècle vint especialament. De nòstre avejaire fau pas mancar aqueu programa de decembre.
 
Per aquélei que se vòlon abonar a-n-un tant bèu programa, va pòdon faire au tel. 04 94 92 70 78 tre lo 18 de junh.