De’n pertot PQVNL a recampat per lo drech d’ensenhar nòstrei lengas

“Es quauqua ren que lo president de la Republica, que ne’n aviá ren a faire nos fague un comunicat. Sent l’eleccion regionala aquò!”. Lo monde se congosta de la situacion davant l’Ostau de Provença, a s’Ais, onte lei Provençaus se donavan rendètz vos disabte de matin. “Es pas de crèire que nos empachan de faire classa en lenga nòstra !” lamenta un regent vengut de la Vauclusa. Memei paraulas dau musician Jan-Bernat Plantevin.

Com’aquò entre estomagada e satisfaccion trantalha lo monde manifestaire dins una trentena de ciutats occitanas. Amb umor e colèra, jutjan lo refus dau Conseu Constitucionau de faire ren que normau l’ensenhament en immersion en lengas regionalas, mai pereu veson qu’en “pas manco doas setmanas totei lei jornaus parlan d’aquela estupiditat, alòr qu’aperabans nos vesián ren que coma folcloristas”.

Deis uns e deis autres s’entendiá aquelei paraulas, dins lo pargue Jourdan, au mitan de l’anciana capitala de Provença, avans que d’entendre lo president dau Forum d’Oc, Guiu Revest, legir de declaracions per resumir la situacion. Dins la fola, Arvei Guerrera, que mena la tiera Oui la Provence ai Regionalas en Provença.

E mai o mens dins leis autrei ciutats d’entre Niça e Bordèu se’s debanat parier, a la demanda de Pour Que Vivent Nos Langues, lo collectiu naissut a l’automna 2019 per sostenir la lucha còntra la reforma dei licèu Blanquer, e arrancar de l’Estat de drechs per lei lengas dichas regionalas.

A Tolon, de monde se’s recampat davant l’Operà, onte podian comptar amé Pèire Costa, cap de tiera Oui la Provence ai Regionalas. A Gap amé de parents de la Calandreta Andrieu Faure un passa carriera se’s organisat. De notar la presencia de Pascale Boyer, una deputada LRM qu’a votat la Lèi Molac e que se’s dicha escandalisada per lei condicions de la sasina au Consèu Constitucionau.

A Orlhac, a Tolosa e di plen de ciutats tot parier de monde s’acampava.

E coma Guiu Revest a s’Ais, an demandat que, bòrd que sembla restancar tota iniciativa democratica, siegue reformada la Constitucion avans la fin de l’an … es a dire avans la presidenciala de 2022, l’article 2 de la Constitucion, aqueu que ditz que “lo francés es LA lenga de la Republica”.

Ansin èra lo sentiment generau a Pau onte se recampavan fòrça monde, e d’onte l’idèa gisclava de crear de comitats permanents “per mantenir la pression, qu’es evident que sensa aquò lei causas se faràn pas soletas” sotalinhava David Grosclaude, ancian elegit de la Region Aquitania.

A Niça L’APLR, associacion dei professors de lenga regionala, a tengut taula duberta per la pressa. De notar que li aviá tanben una deputada votanta de la Lèi Molac, Marine Brenier (LR). Presenta tanben, Ana Maria Sgaravizzi, que mena la tiera Oui la Provence dins Aups Maritimas.