B2Print l’estampaire marselhés que fa de protecciens còntra lo covid

“trabalham fòrça dins l’evenimenciau, mai amé l’ acantonament , tot es estat anulat e nos a faugut reagir lèu-lèu”. Pèire Burel es lo baile de B2 Print, l’ estampaire d’Aquò d’Aquí, e mai per lo jornau un partenari atentiu a sa situacien.

L’entrepressa de Setème (ultima comuna a la pòrta nòrd de Marselha) auriá poscut cabussar amé la perda brutala de sei mercats, mai l’entreprenèire a lèu reviscolat tota la còla am’un projèct de fabricacien de protecciens per lo monde acarat au covid 19.

“Lo sistèma l’avèm concebut lèu perqué l’avèm vòugut simple”, fau que siegue pratic e utilisable quatecant : “una fuelha de plastic transparent pron solide que s’adapta sus un diadèma de PVC e pas mai”. Adonc un ecran portatiu que còsta una ponhada d’euròs.

E dins la meme setmana lo succès siguèt fodrejant : “totplen de Comunas nos n’an comandat entre lo Martegue e Simiana, que ne’n vòlon per sa populacien”.

Mai lo succès serà benlèu efemère bòrd que, de matèri premiera, n’i a pas a bòudre : “avèm poscut trobar de que fabricar 150 000 unitats, après… avèm un industriau, mai li aurà mai de relàmbi...” De setmanas, benlèu de mes.

Normau, que totei lei collectivitats o entrepressas se precipitan per se provesir en plaça de l’Estat que, per dire lo verai, siguèt completament incapable de trobar en mai d’un mes e mieg lei masquetas que devian protegir la populacien.

A l’ora d’ara , per aqueu tipe de proteccien li a ges de nòrmas per va faire ; durarà pas, mai dins l’urgéncia, vesèm que l’inteligéncia e la reactivitat valon mai que lei règlas de l’Afnor ! “Avèm decidit tot de sueita, per aquò avèm poscut provesir nòstre relarg” nos vèn lo baile de B2 Print.