Amé Toscano lo Gelós castigat intra en scena

« A vos que etz aysi dirai /unas paucas nòvas que ay/auzidas dire non a gayre/mas riman las vos vulh retraire » Aquélei quàuquei vèrs d’un tèxte perdut siguèron publicats per Renat Nelli fa quaranta ans, dins lo Tresòr Poetic Occitan.

« Auriáu trobat simpatic de saupre la seguida, alora l’ai escricha… » nos ditz Reinat Toscano, que publica amé son ostau d’edicien aqueu Gelós Castigat, en occitan e francés.

L’istòria es comuna e la trobam tant dins la literatura coma dins la cançon occitanas. Una frema deu suportar lei acusaciens sens fondaments de son òme, un senhor medievau. Tant qu’a faire, acordarà la veritat amé l’acusacien, gràcias a un faus capelan, joine e audaciós.

L’istòria, fòrça dialogada, Reinat Toscano l’aviá ja publicada sota mai que d’una forma, tres còups dins son recuèlh Pergamins. « Segur qu’es una istòria qu’aurai declinada meme en sciença ficcien ! » nos ditz.

Un còup de mai retalhada, la vaquí lèsta d’èstre jugada. « Lo tèxte es cortet, la pèça pòu èstre montada per d’escolans au licèu, o per d’intermèdis dins d’àutreis espectacles » qu’espèra l’autor.

Per leis illustraciens, es estada messa a contribucien Valentina Schalckens, escolana de l’opcion Arts dau Liceu Raynouard de Brinhòlas.

Lo teatre li agrada segur, bòrd que, après Revira-Mainatge, sa recenta istòria fantasticò-poliçò-niçarda, Mistèri au comissariat es portada au pontin per lo Rodou Nissart dins mai que d’una manifestacien.

Reinat Toscano, qu’a publicat una trentena d’òbras amé son ostau Auba Novèla, s’assaja a tres genres :  fantastic, policier e istoric, sensa s’enebir d’òbras diferentas, coma aqueu « Secret de chin » onte un drama familiau rurau es vist amé leis uelhs dau chin d’ostau. E s’es pas manco enebit d’escriure un libre de cosina e una Gramàtica dau niçard.

Mai l’Edat Mejana es una epòca que li agrada fòrça. Aqueu professor d’italian a fargat sa tèsi sus lo tèma deis « Invectivas còntra la Glèisa » a l’Edat Mejana, e nada dins l’òbra dei trobadors Pèire Cardenal e Bernat de Ventadorn « coma dins aquela d’un molon d’autres, Occitans ò Italians, de Guinizzelli e Cavalcanti fins a Dante e Petrarca ».

Fa cinc ans nos aviá ofert un « 1209 lo fuèc e lo fèrre », evocacien druda dau chaple de Besiers, per son uechcenten anniversari,; una celebracien que s’èra pas facha, en França.

Puei, amé Beatritz de Mongalvanh, nos aviá congostats de la vida imaginària d’una libertina que sabiá viure, dins aqueu siècle de fuèc de de fèrre…

« l’Edat Mejana es un periòda important de la creacien occitana, normau de s’en preocupar, qu’es un polit sòcle per l’imaginari ».

De pantaiar una societat e seis usatges taus coma aurián poscuts èstre, segur qu’es una dralha atrivanta per un autor de ficcien.

Reinat Toscano – Lo gelós castigat, Auba Novèla, 36 p. ill. deValentine Schalkens. 5€, texte occitan et traduction française en regard. A commander à : Auba Novèla – 147 quartier La Roguiera – 83143 Lo Vau.