Jaufré Dargent produrrà de vidèos au país

Parpalhon que corre d’aicí e d’ailà, Jaufré Dargent èra en cèrca de la bòna lutz e dau bòn quadratge au concèrt qu’acampava Moussu T.,  Lou Seriol e Doctors de Trobar, dissabte 5 d’abriu ai Dòcks de Marselha.
 
Camèra o cellula en man, assajava de captar au mielhs çò que se debanava sus la scèna.
 
A creissut, l’adolescent que veniá, totjorn risolent darrier son faudau blanc, vos donar lo badat ai cosinas de l’Escòla Occitana d’Estiu en Provença.
 
S’es aquí que comencèt sa notorietat dins lo mitan occitanista, es amb son gaubi de videasta qu’espèra de se far conéisser ara.
 
Jaufré a acabat seis estudis de cinèma a Montpelhier, e amb un amic, Tristan Cordeboeuf, ven de crear Soleu Production, a Ròcavaira (13).

« Tristan a obrat dins aqueu mitan de la produccion vidèo ais Estats Units, mai n’aviá son confle d’èstre anonime. A chausit de s’entornar au sieu. » Jaufré, eu, s’es ja lançat, amb un clip, virat per lo grope de punk ròck Psycowz.
 
« Una activitat dei gròssas de Soleu Production serà segur de captar de concèrts. Mai que d’un còp lei organizators o lei gropes van te quèrre un ostau de produccion a 1000 km. Pensam nosautres qu’aquò se pòu faire en proximitat ».
 
Soleu Production n’es qu’au començament, e segur que la crompa de materiau es una escomessa e demanda de mejans. Adonc pensa a la cooperacion. « Assajam de crear un gropament de materiau per aquò, e anar pus luenh ».
 
La musica, segur que serà pas l’unic gaubi de SP, que farà tanben de filmes, coma aqueu qu’a participat a un concors ; pereu d’efèctes visuaus, e d’animacion en 3D.
 
« Un trabalh professionau de l’imatge per valorizar lei musicians » serà de tot biais una estapa importanta sus lo camin d’aquela còla començarèla.