De Correns a Sant-Bonet lei festivaus ruraus organisan son anullacion

Lei “Printemps dau monde “ tanben jitan l’esponga, o puslèu se ne’n servan per aliscar la manifestacion que venon de remandar au mes de setembre.

Lo Chantier, a Correns (Var, Provença Vèrda) coma totplen de “pichons festenaus”, auriá benlèu pogut mantenir sei jornadas a la fin de mai, coma l’an passat (qu’avian convidat Claudi Marti) mai quid dau public ? Seriá vengut ? Es la question que chirona totei lei bailes de manifestacions artisticas d’aquela passa.

Lo Chantier, creat a la fin deis annadas 1990 per lo musician Miquèu Montanaro, ara amé lo critica Franck Tenaille ai manetas, a chausit de remandar la manifestacion an un moment onte, podem va pensar, la covid serà pas tant un problèma. Sus quatre datas en setembre adonc podretz reservar lei concèrts, d’autant mai que aquelei qu’avian pre-pagat lei plaças li podràn segur utilisar.

Fau sotalinhar que lo Chantier a mantengut tanben totei lei residèncias qu’aviá pas pogut organitzar en causa de l’epidèmia. Segur seràn elei tanben remandadas pauc a chapauc mai leis artistas podràn comptar dessus.

Dins la meme tòca, es lo Festenau dau Chaillol, dins leis Auteis Aups, que vèn d’oficialisar sa non-tenguda aquel estiu. La manifestacion bailejada, ela, per lo pianista Michael Dian, s’espandis sus tot lo territòri despartamentau. Un biais de decidir que siguèt pas facile, a respècte deis actors locaus, coma per exemple lei botiguiers que comptavan atrivar de monde en montanha l’estiu. Es un país qu’escomete sus un torisme familiau e mestrejat…

Aquò dich, entre lei linhas de son comunicat, podem entendre que la tiera de recitaus que fan malhum dins tot lo despartament entre julhet e decembre, aquela serà onorada, meme se sabem pas encara coma. Deuia èstre presentat, lo plan, ai partenaris oficiaus lo 28 de mai

Mai nos respond que “meton en plaça un plan d’anulacion solidari, e que de julhet a decembre li aurà una residència d’artista chasque tres setmana per una setmana”.

A vèire adonc coma s’organisa la solidaritat d’aquelei pichoneis estructuras que pòdon pas escometre sus un reborsament d’asseguranças. “Per la covid, aquò exista pas!” dixit Michael Dian.