Lei musicans d'Òc aculits coma «local heroes» a Nimes

Son de referéncias dins lo mitan musicau occitan e fuguèron convidats de jogar dins la joina SMAC tenguda per Nimes-Metropòla, creada despuèi soncament 3 ans.
 
«Mauresca es quasi mai de dètz e sèt ans de musica ensems e 5 albums : e un percors sus lo long tèrme » rementa Chab.
 
Per quant a d'Aquí Dub, « lo grop existèt de 2001 fins qu'a 2008, puèi lo reformèrem en 2010 embé nòste amic bosniac Mesa» explica Arnaud, lo cantaire.
 
Se tractava adonc d'un eveniment per nostei « locaus » de Montpelhier e Marsilha, a l'entorn d'un barri commun qu'es la cultura d'òc, e mai s'un grop non-occitanofòne (Ilhaam Project) i jogava tanben.
 
Aquesta serada a debocat sus lei conclusions seguentas : d'Aquí Dub es l'onirisme occitano-orientau, lo desenclavement dau còr, la libertat d'una pensada que se vòu eicí e alhors. Es la literatura en voiatge, portada dins de vibracions encantairèlas.
 
Mauresca es lo novèu sòn dau Lengadòc, lo riddim, lo ritme, la rota, la poësia urbana e engatjada. Aquò bastava per convincre lo public que dançava.
 

«Riòta es un tèrme que se retròba sovent dins la musica alternativa, una musica onte nautres se reconeissèm» afirma Chab, de Mauresca, a prepaus dau darrier album «Riòta».
 
Aqueste marca un viratge dins l'enstrumentau dau grop emb «un disc un pauc mai rock».
 
Aquelei caracteristicas novèlas son la frucha dei rescòntres entre lei membres fondators de Mauresca e dei musicians Silvan (guitarista) e Julian (battur) : «a l'escasença dei 15 ans de Mauresca, avèm agut plaser de jogar ensems e puèi avèm contunhat amb elei» apond Chab.
 
E lo novèu Mauresca vei lo jorn per nos porgir «Riòta».
 
Dau costat d'Aquí Dub, se tracta tanben d'un grop de lònga durada maugrat la copadura.
 
«D'en promier èron de compausicions qu'avèm fachas ensems, puèi avèm pres Mesa per lo metre dins l'afaire, embé de tèxtes que son mai principalament de Rotland Pecout» detalha Arnaud, de d'Aquí Dub.
 
«Siam a trabalhar sus l'album segond, mai coma siam dos a èstre a Marsilha, un autre a París e un autre en Alemanha, se recampam un còp per mes» ditz a prepaus de la produccion de venir «a la fin de 2016» espèra-ti.
 
Per Mauresca, la virada de Riòta s'acaba en novembre e lo grop es ja dins la compausicion. «Siam dins la fasa primièra, experimentala, assajam de pausar de voetz, de tèxtes, de guitara» nos confisa Chab. «E benlèu qu'aurèm enveja d'en cantar quauquei tròç dins l'estiu» sugerís. De seguir. 

Lo concèpt «Local Heroes» de la Paloma leissa pas indiferent nòsteis eròs occitans. «L'idèia es bòna, car i a tant d'endrechs culturaus que son pas pròchis dau territòri que son implantats» remarca Arnaud, que «saluda» tanben l'iniciativa de la SMAC de Nimes de pas èstre estada «frilosa embé l'occitan».
 
Tota-fes, Chab estima que «cantar lo dijòus de sèr en octòbre es pas tant un moment bèu, subretot que la sala es en periferia».
 
Investidas dins de registres fòrça diferents, lei musicas de Mauresca e d'Aquí Dub an interessat la Paloma per una serada entre Occitània e Orient.
 
Per Mauresca, «en 40 minutas, as gaire lo temps de comprene çò que s'i passa» e per d'Aquí Dub, « lei gents son puslèu dins l'escota que dins l'estrambòrd» d'eitant mai que se defenisson coma estent «fòra d'una dralha d'entertainment» coma lo conceptualiza Arnaud.
 
En brèu, i a quicòm d'entreténer dins aquela SMAC, tot en desvolopant la question de la proximitat, de la pertinença e tanben, de segur, la plaça de l'occitan dins lei concèrts de la Paloma. Coma «local heroes» ò pas, d'alhors.