Mariana Flores premiada dau prèmi Gabriel Dussurget

Lo public dau Festivau d’Art Liric d’Ais de Provença descubriá en julhet de 2023 una viva cantarèla argentina dins lo ròtle d’Elena, reina de Sparta, cortejada, emai puslèu subjugada, per Menelàs, Rei de Sparta, vestida en frema. Mariana Flores jugava pasmens lo personatge ben que siguèt embarassada . L’operà siguèt un trionfe, tant per ela que per son òme, lo cap d’orquèstra Leonardo Garcia Alarcón, reconeissut coma especialista de la musica barròca, que bailejava l’operà.

Onge ans puei vaquí son fiu dins la grand sala dau Conservatòri d’Ais, per picar dei mans a sa maire, que veniá de reçaupre lo prèmi Gabriel Dussurget, decernit per la nebòda dau fondator dau Festivau Sestian, Kathleen Fontmarti-Dussurget.

E avans que de montar un còp de mai sus lo pontin sestian en julhet que vèn, per jugar la Minerva dau Ritorno d’Ulisse in Patria, de Claudio Monteverdi, encara un còp dirigit per Leonard Garcia Alarcón, la sopranò a cantat la ponhenta cançon de Barbara Strozzi, Che si puo fare, que Youtube n’en prepausa tres versions diferentas.

Naissèt en 1980 a Mendoza, la ciutat dau ponent d’Argentina au pè deis Andas, Mariana Flores, onte viviá amé sa familha, encò de sei grands, tant èra afectada, la familha, per una d’aquelei crisis economicas que pertòcan de lònga lo país. Li aprenguèt lo piano, puei lo cant dins una d’aquelei Niños cantores qu’acampan d’enfants per li faire cantar. Vista coma talentuosa la vaquí, de fieu en cordura fins qu’a la Schola Cantorum de Bâle, en Soissa.

« Chasque jorn que passa regreti d’èstre tant luenh de l’Argentina » qu’a poscut dire despuei lo pontin dau Conservatòri sestian, avans que de cantar quauqueis unas d’aquelei pèças que l’an facha celebra.

Fòra d’aquelei luecs, lo Festivau d’Art Liric a començat despuei lei premiers jorns de junh per d’espectacles a gratis sus escrans gigants. Aperaquí 15 000 personas auràn poscut n’en profiechar. Puei s’endralharàn, dau tres au vintatres de julhet, leis artistas dins lei produccions d’un festivau oficiau qu’èra pasmens dins la brefoniá financièra (am’un trauc comolar a l’ultima ora per lei collectivitats publicas per mai de tres millions…) fa un mes encara.