Ais prepausa uech operàs que quatre son de creacions

Pas mens de uech operàs, e entre aquelei quatre creacions e comandas dau Festivau d’Art Liric d’Ais, vaquí l’escomessa d’aquela organisacion qu’a crebat l’uòu en 1948, e que, pasmens, a coneissut lei piègers engambis en 2015.
 
Aquel eveniment internacionau a perdut son partenari màger, esta annada, amé lo desengatjament de Vivendi, que sosteniá lo Festivau despuei .

Aqueu a poscut pasmens lo remplaçar per Altarea Cogedim, un promotor internacionau de centres comerciaus, ostalariás e autrei burèus.
 
Mai la crisi passa per aquí, que lo Festivau a reduch sei otís de comunicacion, coma lo CD qu’amolonava de musicas entendudas sus la scèna sestiana, que degun trobarà en 2015.
 
Am’un budget de 22,3 M€, qu’un gròs tèrç es pagat ‘mé leis entradas e la venda d’espectacles, es quand meme carmeme per 37% que leis ajudas publicas li permeton de viure e de jugar son ròtle, crear.
 

Justament 2015 serà una annada richa d’aqueu ponch de vista. A costat d’Alcina d’Haendel, dau Raubatòri au Seralh de Mozart, d’un Iolanta de Tchaïkovski, d’una Persefòna de Stravinski, e dau Pantai d’una nuech d’estiu de Britten, ara classics entre lei classics dau repertòri, Ais va crear mai d’un operà.
 
Amé Le Monstre du Labyrinthe, que se dona lei 8 e 9 de julhet, vaquí una òbra de comanda au compositor britanic Jonathan Dove, que serà d’alhors creada tanben en Anglatèrra e en Alemanha, dins tres lengas, e que sa tòca es de faire cantar lei amators de mai que d’un còr. A z-Ais, n’avèm ja parlat.
 
Amé Spectres, es la coregrafa provençala de tria Josette Baïz que metrà en movament cent dançaires e autant de musicians, per aquela revista de matagòts que vanegaràn entre leis univèrs musicaus de Britten, Crumb o Mozart, entre autres.

Be with me now es un autre espectacle d’operà que pasmens ne’n es pas un, mai puslèu una escorreguda dins l’univèrs de l’operà europenc, am’ un argument interessant : lo prince Tamino (aqueu de la Flaüta Encantada) recèu una letra de rompedura. Pamina lo quita ! Decida alòr de tornar vèire totei leis luecs ont an viscuts de cotria de causas fòrtas.
 
Produccion de l’Acadèmia dau Festivau (son escòla de talents), Svadba (maridatge) es un operà per sieis votz de fremas, que cantan a cappella. Òbra d’Ana Sokolovic (una joineta naissuda en 1968), nos parla de l’ultima nuech de Micica, que se marida lo lendeman, e que va premier festejar entre colègas. Una dei tòcas d’aquel operà de chambra es de revisitar la musica folclorica est-europenca.
 
Fòra d’aqueleis operàs, òbras ancianas o creacions, aurem d’espinchar lei vespradas consacradas ais  autrei festivaus dau Sud, aqueu d’Essoira (Marròc) e de Baalbek (Liban), que li convida sa sòrre sestiana.