Tatou : « lo Japon es l’empèri dei musicas dau monde »

A Osaka, lo pòrt industriau japonés, « lei carrieras son pas tant netejadas coma va son dins lo rèsta dau país, e quand laissavi mon saqueti, li aviá totjorn de monde per m’avisar qu’èra pas prudent ».

Per Tatou, lo cantaire dau grope, la bèla vila en riba de l’ocean Pacifique li aurà agradat mai que tot dins un viatge qu’a menat tota la còla de Moussu T. e lei Jovent sus lei scènas de Tokyo e Osaka. Se compren perqué.
 
« En veritat tot lo monde me l’aviá dich : « Osaka au Japon es coma Marselha en França ».

E èra verai : lo monde parla un dialècte, l’Osaka-Ben, que n’avèm retengut quauquei paraulas, que fasien s’estraçar dau rire, puei, lei Japonés qu’avèm rescontrat a Tokyo. De biais de dire coma « trop méchant » o encara « frit confit » tròbon son equivalent a Osaka. Es aquò que m’a seduch , per dire la veritat, una vila que manten son originalitat ».

Puei se son rendut còmpte que mai que d’un Japonés aviá aqueu sens de la derisien que fonda tanben l’umor provençau. « Vos rementatz de Fukushima ? Li aviá amé nosautres un tipe que passava de’n pertot amé son comptaire de millisiverts ! sota lei mòbles, dins lei bocas dei conduchs… ».

Sabon se trufar de sei problèmas, lei Japonés, qu’entre crisi, proximitat garrolhairitz de la China e catastròfas naturalas, son pasmens pas pichons.
 
Fa doas setmanas que lei nòu musicians e autrei collaborators de Moussu T. se son entòrnats au sieu après una bèla virada japonesa : cinq datas sus lo pontin, a jugar son blues marselhés, e de bèleis suspressas. 

«  Li aurà agut de cinquanta a quatre cents personas segon lei concèrts » que nos ditz encara Tatou.

«  Fau dire que l’Institut Francés de Tokyo aviá fach una bèla comunicacien.  Una cauva m’a espantat : lo public, mai que d’un còp, cantava lei cançons… e me demandi ben coma avián l’idèia de ce que diguèron. Mai tant pièger ! L’ambient èra fantastic. Mai estonant per ieu encara, lei gents que venguèron au concèrt am’un camisòt estampat « Massilia Sound Système ».

L’estrambòrd mai que d’un còp siguèt d’aquelei vespradas de musica, que ditz Tatou.
 
Lo rapòrt amé la pressa siguèt encara una occasien de s’espantar. « Lei jornalistas que son venguts nos vèire an menat d’entrevistas d’una ora e pas mens » sotalinha Tatou. « E sabián a pauc près tot de nos avans meme que de nos saludar. S’èron alestits au rescòntre». De bèus professionaus, nòstrei confraires nipons. 

Benlèu, la reson de tot aquel envam per la musica occitana, la podèm comprendre am’aquela visita que la còla de Moussu T. faguèt dins un magasin de disques.

« Eriam a Tokyo, nos an menats dins un building, e au desen nivèu, après un corredor de betum, una pòrta s’es dubèrta sus un univèrs incredible : de molons de CD de ce que diam de « musicas dau monde », amé de cantaires iranians o turcs que jamai n’avèm ausit parlar au nòstre. E, au mitan, la mai granda colleccien de disques de musica occitana que jamai aviáu vist ! Lo Massilia Sound Système, Dupain, Gacha Empega, Du Bartàs, li èron, totei comandats perqué se son chuchotejats de l’un a l’autre qu’èra una musica flama… un vertadier pantai per ieu ! » La cultura japonesa es mai a la curiositat que ce que pensam.
 
Lo grope s’es pas sentit completament dins un  autre monde durant aqueu viatge, « d’autant mens qu’eriam aculhits per d’amics de lònga, e que, autra suspressa, avèm recebut la visita de Naoko Sano, venguda per una jornada de Nagoya, monte rèsta, a Osaka, monte eriam alòr. »

Esto còp es lei Japonés qu’acompanhavon lo grope ciutadenc que siguèron estabosits  per la professora occitanofòna de Nagoya : totei lei conversaciens « am’aquela joina frema tota plena d’umor que conoissiam pas encara» se diguèron en occitan. Benlèu que naissèt an aqueu moment una mena de malhum favorabla a la musica occitana a vint mila quilomètres de la beguda O’Central.
 
« Segur qu’amé tot aquò jamai se siam sentits coma de toristas. E avèm agut de mau per s’ enanar. Nos èra dejà arribat aqueu sentiment quand siam anats au Bresiu fa quauqueis annadas».
 
Ara que l’avion lei an tòrnats a Marselha, dejà Moussu T. e lei Jovents sont anats jugar en Italia.

E, se, d’asard, de Japonés leis an mancats a Osaka, aquelei podràn segur assajar de leis anar escotar a la Fira de Manresa, en Catalonha, lo 8 de novèmbre venènt. Auràn d’alhors l’astre de li vèire mai que d’un grope occitan.