Denis Galvier « Urosament Trad'Hivernales es un festenal implantat »

Coma definissètz-vos aqueu festenau ?


Se tracta d'un festenal de dansas e musicas tradicionalas. Mas volèm mai que mai insistir sus la modernitat d'aquelas musicas e lor necita evolucion.
 
D'efièch, ensajam de mesclar las diferentas tendéncias d'aquelas musicas dins la programacion.
 
Mas en mai d'aquò, es un festenal ont l'occitan a una plaça importanta. Per ieu es pas un festenal occitan, mas un festenal en Occitània. Un territòri linguistic e cultural fòrt, dubèrt e aculhissent.
 
Avetz-vos notada una evolucion dau public despuèi lei promièreis edicions ?
 
Per nòstre ben-astre grand lo public es vengut de mai en mai jove, es la pròva qu'aquela cultura es pas del passat.
 
Son tanben de mai en mai nombrós, maugrat l'abséncia complèta de difusion d'aquelas musicas sus los mediàs oficials.
 
Aquò mòstra plan que quicòm podriá avançar s'i aviá mai d'atencion portada sus aqueste fenomèn.
 
 
Quetei diferéncias avètz vistas, entre 2000 e 2015, dins lo budget que vos es donat per lei Trad'Hivernales ?


Dins un primièr temps, las subvencions son partidas de pas res, doncas lo budget podiá pas que montar.
 
Puèi foguèt de còps un pauc sacquejat ; mas avèm capitat dempuèi qualquas annadas d'aver una convencion amb los partenaris per los finançaments.
 
Fa pas que tres o quatre ans qu'avèm de pichonas baissas de subvencions.
 
Urosament que sèm un festenal implantat ! Que sembla ben que siá mai complicat per los pichons eveniments...

Sus vòste blòg parlatz de dificultats financieras maugrat l'ajuda de partenaris. Aquò a-ti demandat una organizacion novèla dau festenau ?
 
Cap a tres ans fa, la dintrada de la primièra vesprada foguèt a gratís, que voliam que cadun podèsse venir e subretot lo public local, amb lo repais partejat que comença lo festenal.
 
Mas dempuei, per capitar l'equilibre, avèm fach un dintrada a prètz liure. Lo mond a ara plan comprés que nos ne podiam pas passar.
 
L'Estat sembla pauc engajat d'ajudar la cultura, e encora mens la cultura occitana. Aquò ven piéger. De que sarián vòstei solucions per la perenitat de vòste festenau ? 
 
De fach, avèm pas d'ajuda de l'Estat, la DRAC nos a pas jamai ajudats.
 
Ara, l'incertituda maja es a l'entorn de la refòrma territoriala. Que sabèm pas çò que va advenir amb la fusion de Lengadòc-Rosselhon e Miegjorn-Pirenèus, nimai cossí se va far la refòrma dels despartiments.
 
E avèm besonh d'aquelas ressòrgas, las nòstras subvencions son pas gròssas per un eveniment que recampa mai de doas milas personas en ivèrn e ont avèm dètz-e-sèt grops de musica de pagar.

Avetz-vos de resultas regardant la frequentacion dei sieisencas Trad'Hivernalas, se òc, de qu'es vòste avejaire ?


La frequentacion d'aquest an es a quicòm pròche la meteissa qu'aquela de l'an passat, una annada recòrd.
 
Lo festenal, dins l'encastre actual, se tròba a un pompidor. Doncas l'espaci nos permet pas d'aculhir mai de mond e se regula solet.
 
De qué son vòstei consèus ais organizaires d'eveniments culturaus de caractère occitan, dins una actualitat coma la nòstra ?


Es pas aisit de donar de conselhs, quand siás totjorn a reglar al jorn lo jorn los problèmas per l'edicion que ven...
 
Pòdi just dire que çò qu'a permés a Las Trad'Ivernalas de téner sièis annadas, es avans tot lo fach de gardar una còla mobilizada amb de bons e de marrits pas, de moments de descoratjament.
 
Mas i a tanben de vam, d'estrambòrd e de nhaca. Es una soma de fidelitats que fai nòstra fòrça. E aquò ven pas solet. Nos o cal entreténer. E quand as lo projècte, lo problèma es de trobar e servir la còla.
 
Per lo moment, e maugrat de tempèstas, lo batèu ''Coriandre'' ten la mar !

Ecrit en languedocien selon le parler de l'interviewé. Les questions sont rédigées en provençal rhodanien, selon le parler de notre journaliste.