
Escriguèt perèu lei prefàcias de dos libres de receptas de cosina tradicionala dau quotidian : L’alimentation provençale et la santé (edit. Barthélemy) pèr lo còmpte de la MSA, e Alimentation méditerranéenne et santé (edit. Barthélemy). E portèt pèira a d’autres obratges coma lo libre de recèptas de la Valada de Tolorenc, o encara d’un librilhon sus « l’utilisacion racionala dei espècias vegetaleis indigènas » (Louis Borel, G. Simonet). Enfin li devèm dos obratges : La cuisine des Provençaux, Saveur, santé, art de vivre (Edisud), e dins un autre domèni Lei còntes dau Pardés (L’Espaci Occitan) : ensems de còntes que fuguèron publicats per Aquò d’Aquí en granda partida.
Un pedagògue de terrenc
Lo metge rescontrèt au començament deis annadas 1970 Luciana Porte-Marrou, dins d’estagis d’occitan, onte preniá consciença de son occitanitat. Avinhonenc, se metiá alòr a organisar amé Andrieu Benedetto mai que d’una iniciativa, coma lei Rescòntres dei Lengas que se debanèron tres ans a-de-rèng au Teatre dei Carmes, lo temple culturau populari d’Andrieu Benedetto. Après de discutidas e de pèças jugadas, lo monde s’acampava sus la plaça pèr una granda taulejada amé cants e musicas en lenga nòstra.
Son occitanitat l’inscriguèt dins una accion dau passatge de generacions, bòrd qu’èra tanben afogat d’intergeneracionalitat. Trabalhava amé la MSA a la coneissença dei sabers de santat dei païsans, e d’un mòdule de formacion : « apprendre des anciens », a Mondragon e Malaucèna.
Cors d'occitan e interés pèr lo teatre d'òc
Toteis aquelei que podèm questionar sus sa vida nos an dich coma son ostau èra dubèrt au brave monde, e coma aviá de paciéncia dins lei discutidas.
Li es arribat sovènt de prepausar d’articles a Aquò d’Aquí, sus lei sujèts lei pus divèrs.
Seis obsèquias se faràn en Avinhon, au crematorium, 1483 camin dau Lavarin, divèndres 4 de janvier a 15 oras (tel. 04 32 44 80 76), puei dissabte a 14 oras et mieg lo depaus dei cèndres se farà au cementèri de Cucuron, onte la familha a son tombèu.
A sa frema Janina, a tota sa familha, Aquò d’Aquí presenta sei còmplanchas.