Una alternativa au gas russe per l’Euròpa ?

Amé la crisi russò- ucraniana siam polits ! Per faire giblar l’Ucrània, Vladimir Poutine es ara lèst de li copar lo provesiment de gas. E coma l’aviá dejà fach en 2009, deu èstre seriosament considerat aqueu debanament.
 
Vèn d’amenaçar son vesin de restancar lei liurasons de gaz se paga pas son deute. Am’aqueu, si trata en veritat de quatre ans de remessas, que la Russia a cancelat d’un còp, bòrd qu’Ucrània es en freg.
 
E Poutine ven d’escriure ai país de l’Union Europenca per leis avisar qu’aquela copadura entrepachariá tanben la liurason d’aquelei.
 
Mai es que l’Euròpa podriá vertadierament resistir au cantatge russe sus lo gas ?

L’Alemanha ne’s l’esclau, que 30% de son gas (coma 26% de son petròli) vènon de Russia. E coma aqueu país s’es engatjat a far descréisser son industria nucleària, li rèsta pas tant de solucions. Mai siguèt una suspresa dei gròssas d’aprendre qu’en plena crisi, l’alemanda BASF a crompat 25% dei parts d’una jaça siberiana de gas, esplechada per Gazpròm, e qu’en meme temps, la societat alemanda a vendut sei sites d’amolonatge de gas a Gazpròm.
 
Per la França, es diferent, bòrd que crompa ren que 13% de son gas ai Russes. Lei liurasons arriban d’en pertot : Olanda, Norvègia, Argeria, e tanben d’Egipta, qu’un terminau gasier siguèt bastit a Fòs (13) per acuélher lei liurasons d’aqueu darrier país, en seguida d’un tractat francò-egipcian signat fa mai de dètz ans.
 
E pasmens, la crisi aquí tanben, empacha pas una societat d’energia avinhonenca, SFGE, de lançar son activitat, despuei lo mes de mars, amé de gas russe, estènt que Gazpròm serà son provisionari exclusiu.

Un còp mandada la menaça Poutinenca d’agotar lo gasoduc russò-ucranian, José-Manuel Barroso, lo president de la Comission Europenca, a escrich ai responsables de chasque governament per demandar que siegue trobada « una responsa collectiva », maugrat de situacions de dependéncia ben diferentas d’un país a l’autre.
 
En veritat aquela situacion devriá pas s’esperlongar, bòrd que la Russia bastisse dos novèus gasoducs qu’evitaràn deman l’Ucraïna. Mai benlèu que Gazpròm nos farà tot aquò per ren, finalament.
 
Leis Europencs, alassats deis ukases de Poutine, devrián se provesir diferentament dins l’avenir.
 
L’implicacion deis Estats-Units d’America dins la crisi russò-ucraniana, que se vei ben amé lei visitas adarré dau Segretari d’Estat american, sembla justament pas ren que desinteressada.
 
« Leis USA passon d’un estatut d’importator de gas an’aquel estatut d’exportator. E nos fa crenta, que li vendrem plus nòstreis idrocarbures! » nos disiá ai premiers jorns d’abriu Francis Duseux, lo PDG d’Esso. « Despuei que leis Americans esplechan a granda escala son gas de chiste, an reviscolat tota son infrastructura de produccion. Ara nos crompan plus de gas, e deman ne’n vendràn a tota l’Euròpa ».

Fau ajustar an’aquela situacion que devriá destapar sus l’abaissament dei crompas de gas russe, lo reviure de la produccion dei país arabis. « L’Arabia Saodita es a investir mai que mai per esplechar lei gas que vènon amé sei potz petroliers » ditz encara Francis Duseux. « E coma a Dubai la produccion s’auça francament, leis exportacions vendràn d’ailà tanben ».
 
« L’Est de la Mediterranèia a totei  lei chanças d’èstre deman una dei majoras regions dau monde per lo provesiment de gas naturau » qu’assegurava fa pauc de son costat Francis Perrin, director de Stratégies et Politiques Energétiques (SPE, un editor de revistas especialisadas) dins un collòqui sus lo comèrci maritime.
 
« Lei jaças son de centenaus de miliards de mètres cubes entre Israël, Chipre, lo Liban e la Palestina » qu’ajusta l’especialista.
 
…e meme Gazpròm assaja de crompar de jaças au Liban ! Per Francis Perrin,  « lo biais de menar sei relacions internacionalas per la Russia, impausarà ais Europencs de diversifiar sei provesiments ».
 
E, am’aquela solucion, ges de necessitat de gasoducs ; linhas de jonchas per l’energia, mai linha de fractura per lei relacions diplomaticas. Lo gas mediterranean vendriá per la mar.
 
Pausariá de bravei problèmas d’environaments marins, mai reviscolariá l’activitat dei pòrts d’Italia o de França… d’onte seriá vendut e menat per d’autrei gasoducs en Alemanha, aqueu gas.
 
Un pam de nas per la politica poutinenca, que podriá pasmens pas arribar avans d’annadas.