Tatou e Blu que promenon

Fau encambar quauquei lònas que la chavana de la velha a laissat sus lo quitran , crebat e pedaçat quinge còps. De tubaires s’acampan a la pòrta, que fau passar per, de suieta, se trobar enviròutat d’òmes a casquetas ; puei avançar dins lo sorn e crosar de monde assetat au bar onte pluejan dos per dos lei gòts de bièrra. Lo chamatan dei conversaciens te fai deja una mena de musica, que ritma una joineta quand s’estraça dau rire. Vaquí lo trefons d’aqueu corredor ai muralhas cubertas de dessenhs. « Perdon ! » « excusatz ! » fau èstre sople per passar jusqu’ai pofs onte s’amolonan aquelei que son venguts d’avança, per veire e escotar Blu e Tatou.
 
Lei dos collègas se son escapats de sei còlas abitualas, Lo Massilia Sound System e Moussu T e lei Jovents, per se pagar aquela escapada a l’Intermédiaire, la beguda marselhesa de la Plana. 

Aquí « Tatou et Blu en ballade » endraian son escorreguda musicala. Faràn entendre coma aquò, entre guitarra e vòtz, pas mai, son repertòri lo mai intime. Planplanejaràn. Tatou prendrà lo temps d’una explica avans la cançon, Blu farà pas montar lei decibels, au contràri, mai jugarà son blues de tria.
 
Tatou entamena « Sus l’Autura ». Nos vèn dejà de 2007 aqueu tròç, mai jamai siguèt tant d’actualitat : « lo vent si garça dei frontièras / ti fau viatjar ‘mé son trin », que l’i parla dei barcas de clandestins.
 
Puei lei morsèus s’encandenan a de reng , de novèlei bièrras arriban, la barmaid es en aia , quauqueis uns se quitan la casqueta, e ieu espèri « La nuech de mon astre », que cantarà un autre còp.
 
Lo public l’entendrà benlèu lo 5 de març a La Cieutat, au bar La Renaissance per 19h30. Puei, a Sant-Cerí lo 11, es lo grope Moussu T e lei Jovents que jugarà per l’associacien Un soir au pavillon. Senon, faudrà anar ailalin , a Tolosa sus La péniche les marins d’eau douce lo 25, o l’endeman a Serres (Auda) a La Claranda.
 
Mai pertot, faudrà sacher apreciar aquelei moments mai retenguts, onte chifrar se pòu conjugar ‘mé cantar. Serà bèn temps de retrobar la vòlha d’ensems mai consacrats a bolegar sus scèna, e a l’i metre lo fuec. 

Per esperar lo CD venènt de Moussu T, au revenge, faudrà de paciéncia. « Navega » èra estat enregistrat au Pòrt de Boc fai quauquei temps, mai lo disc l’aurem que per l’autona. Per lo moment passa après lo grand juec dei capitalistas que se manjan leis uns leis autres.
 
Harmonia Mundi, despuei la mòrt de son creator Bernard Coutaz en 2010, èra a vendre. Es lo Bèlga PIAS que l’a crompada en octòbre passat, la companhia arlatenca. Mai lo novèu grop internacionau a decidit de plus sortir de noveutats per Le Chant du Monde, son label dedicat ai musicas trad de creacien. Ne’n prepausarà plus que lo catalòg. Justament es am’aqueu que deviá èstre produch lo CD de Moussu T.  Lo temps que li tròban una solucien, leis enregistraments rèstan au frigò, que de’n parlar nos fariá venir l’aiga en boca…
 
Alòr, profiechar dei passejadas de Tatou e Blu ajudarà bèn a esperar. Una autra bièrra ?...