Lei bars e restaurants duerban après una setmana d'enebicien

A l'ora qu'a Paris se tracta d'organisar l'accès de la practica ai restaurants e ai bars, a Marselha e a s'Ais, l'Estat acacha l'enebicien de faire tot parier. Lo ministre de la Santat aviá decidit la barradura de totei aqueleis establiments dins lei doas vilas fa una setmana, e d'un biais unilaterau.

Subran lo monde dei bailes politics provençaus aviá denonciat lo caractèr autoritari de l'Estat, qu'aviá decidit sensa cap de concertacien. Lo Consèu Regionau aviá lançat un recors juridic per anullar la decisien governamentala.

Aièr diluns lo prefect de Regien en Provença a renonciat a la severitat d'aquela mesura, e son arestat autorisa l'acuelh dau public dins bars e restaurant, dau moment que lo monde es assetat, amé un metre entre doas cadièras e pas mai de sièis practicas per chasque taula. 

Lo meme jorn L'Ostau de Provença, l'establiment municipau d'acuelh deis activitats provençalistas nos fasiá saupre qu'eu èra pas autorisat encara a reçaupre de public.