
Fin qu’ara lo CAC èra gravat d’un costat per lei « musicas actualas » e d’un autre per lei « musicas tradicionalas ». Pasmens, aquelei son bèn de creaciens actualas…
Per lo premier còp en 2012 adonc a mesclat sei dos despartaments magèrs : aqueu dei musicas actualas, et aqueu de la musica tradicionala.
« Fau desbugetar , bòrd que la musica trad ‘ es una musica de creacien. Aquò farà parlar ! » que nos ditz Pèire Bonnet. L’encargat de missien dau Consèu Regionau a la Lenga e Cultura Regionala, amé sei collègas dei Musicas Actualas, es l’artesan d’aquela mescladissa.
Far conéisser son trabalh fòra dau cèucle
« Es un biais per lei musicians occitans de faire passar son òbra, de far conéisser son trabalh fòra dau cèucle » e d’èstre reconoissut coma musicians de creacien, una nocien que còmpta fòrça per Pèire Bonnet.
Leis artistas gravats sus lo « CAC 2012 » son chausits dins un comitat de seleccien e sembla pas pus mau de far ausir a d’autrei professionau lo gaubi deis artistas d’expressien occitana.
« Es una promocien per leis artistas qu’èron renjats dins la categoria « musicas patrimonialas » de far ausir que son bèn de creatius » qu’ajusta l’encargat de missien. « E faut bèn dire que totei an una vitalitat dei bèlas, que son dins lo trobar, e que mai que d’un a un gròs talent ».
Estampat a 5000 exemplaris

Aqueu rescòntre pòu èstre fa amé lo disque. Aqueu compren cinquanta sèt tròçs onte trobarem tant lo bresilenc Rio Mandingue coma lei « musicas creativas dei Balkans » d’Aksak o encara lo grop occitan Fòrabandit. Estampat a 5000 exemplaris, lo « CAC 2012 » pòu èstre trobat dins leis eveniments musicaus de la Regien Provença Aups e Còsta d’Azur, coma dins aquelei qu’organisa son partenàri l’Arcade Paca (un organisme de formacien ais artistas).
A agut pron de succès dins un salon professionau italian onte Pèire Bonnet a representat la Regien fa tres setmanas : Medimex, a Bari (Polhas), onte la bandièra regionala diguèt : « La musica e la lenga d’òc ». La veirem aquela au mes de mars a Marselha, per un autre salon dei musicas trad’ de creacien, Babelmed.
Serà interessant de precisar qu’aqueu disque es a gratis.