Captain Flo ja dètz ans de musica

Ja dètz ans que l’enfant dau Ventorn caneja lo pontin, cantant, parlant e samplant, micrò en man, lo det sus lo negre de la galeta 33 torns.

Amé Florens Charras, aliàs Captain Flo, lo raggamufin s’es ruralisat.
 
Divèndres 19 d’abriu au Cafè Ciutadan 3C d’Ais, e davant una vintena d’afogats e curiós, a encara creat un ambient estrambordant mai tanben per cantar leis escomessas d’èstre païsan, una briga en anglés, mai en francés, e tot plen en provençau :

«  dans le sud on se ramasse tous les gros enfoirés / qui ont tant de blé qu’ils savent plus où le fourrer / ça bétonne à tour de bras dans les terres cultivées / même que nous on peut plus bosser / Ils nous collent des procès / foutent leurs eaux dans nos vignes / et appellent les condés / quand le matin toi tu viens bosser / ils te foutent des alarmes, des gros chiens, des barbelés ».

Clar qu’am’eu leis empachas ai païsans troban un biais de « blues ».
 
« Sas ! après tot, lei musicians dau reggae que m’inspiran, èron pas mai que d’enfants de la tèrra, venguts a la ciutat, mai sensa oblidar d’onte venguèron » que nos ditz. Captain Flo es enfant de païsan, a fach d’estudis d’agronomia, e a trabalhat la tèrra tres ans, avans que de s’enanar a Barcelona per assajar de trobar lo feeling d’artista, qu’ara ne’n congosta lo public Provençau.
 
L’òme, a pena trentenari, ditz seis influéncias : Massilia Sound System e Jan-Bernat Plantevin, totei dos ben diferents mai que dison la fiertat de sa cultura, e la convivéncia de quau coneis sei vesins e canta per elei.
 
Après aquelei dètz ans, vèn de publicar un librilhon-CD que rementa tot son percors, son biais de pensar e de cantar. 10 Zan DeZik MéZon, ditz, coma l’escriu : « 2008-2018 Ten years on Hand Made Music ».

D’aquel artista, ja coucat sus lei paginas d’Aquò d’Aquí en 2018, ne’n farem lo retrach e i laissarem la paraula dins nòstre numerò de junh. Ja podètz vos i abonar.