A Cogolin : « Lo XVenc còrs e non Barrès ! » per quatre istorians

« Maurici Barrès es d’aquéleis intellectuaus que diguèron que lei Meridionaus colonisàvan la França » aplomba Jan-Maria Guillon.

E l’istorian de citar lo clairon dau nacionalisme francés : « aqueu disiá que « aquélei frivòleis Miegjornaus son la causa vidanta d’aviliment dei consciéncias, de l’abaissament morau e politic de França » (in La Patrie, 1903). Es un qu’alestissèt moralament lo marrit procès que lei bailes de l’Estat faràn puei au XV^en còrs en 1914 ».
 
Lo problema es que lo premier cònsol de Cogolin, lo FN Marc-Estienne Lansade, voliá sonar « Maurici Barrès » un parcament de veituras en projècte.

La proposicien siguèt facha en julhet 2014, en consèu municipau, alora que veniá d’èstre elegit dins la comuna varesa de dètz mila abitants.
 
Ara brama que leis istorians vòlon li faire un marrit procès per rason politica.

L’òme serà ben sus la tièra dau FN ai Regionalas, alora que lei sondatges li dónon la premièra plaça.

"Li agradariá mai sus lo moment, segur, d’escafar una briga sei referéncias idelogicas" ajusta JM Guillon.

Es qu’a la mitat dau mes d’avost quatre istorians –JM Guillon, amé Maurici Mistre, Laurenç Pavlidis e Bernat Romagnan - an publicat una letra dubèrta dins lo quotidian Var Matin an aqueu prepaus.
 
« Aquela chausida seriá una injúria a la memòria dei sordats provençaus mòrts per la França dins la premièra guerra mondiala », en particulier dei Cogolinencs mòrts en 1914, justament alora que lei generaus leis avián mandats se faire chaplar en Lorena.
 
ME Lansade qu’es pas Provençau a l’origina, benleu saup pas aquò, mai coneisse ben la tòca de Maurici Barrès. « Segur Barrès es tamben un escrivan, mai per èstre onèste, a l’ora d’ara plus degun lo coneisse per son òbra. Es ben l’inspirator dau nacionalisme francés que lo cònse vòu glorifiar ».

Maurici Barrès, naissut en Lorena en 1862, a desvolopat sa pensada dins de jornaus coma La Cocarde que n’en serà lo baile, alora qu’es elegit deputat bolangista. Au moment de l’afaire Dreyfus cridarà que lo capitani jusieu « es capable de traïr, lo dedusi de sa raça ».
 
L’ideològue combatrà pereu l’intrada d’Emili Zòla (un Sestian !) au Panteon. « Monsur Zòla, lo regardi a sei racinas : aquel òme es pas un Francés », bòrd que sei rèires serián Venicians.
 
« Segur qu’a l’ora d’ara, amé leis elecciens regionalas, lo partit dau cònse de Cogolin fai oblidar sei referéncias lo mai possible » perseguisse Jan-Maria Guillon. « Mai per nosautres, aquelei que dévon èstre onorats dins la Comuna, son ben aquélei malurós sordats provençaus dau XV^en còrs ».