Se duerbe la uechena Setmana Provençala d’Avinhon

Tre dissabte 30 de setembre e per una bèla setmana Avinhon mòstra divèrs aspectes de nòstra cultura au public. Per lo uechenc còp l’Ostau de la cultura provençala d’Avinhon, amé l’ajuda de la Comuna, prepausa sa Setmana Provençala, e jusqu’au 8 d’octòbre se debana un polit programa.

Una oportunitat per demandar a Chantal Fournillier, la segretaria de l’IEO Tèrra d’Òc (l’IEO de la Vauclusa) coma vai lo biais.

Chantal, li a un programa de tria en Avinhon aqueu començament d’octòbre, amb un concèrt d’Andrieu Gabriel, de teatre amé Le siège de Caderousse, òbra dau sielce XVIII, de conferencias, e meme d’ataliers de realitats virtuala a prepaus de la Bovina ! Mai de son costat que prepausa l’IEO ?

Quatre moments e iniciativas. Premier una mòstra sus l’insècte que nos a ben ajudat per aquò lo musèu Requien, puei un balèti a Montfavet, una conferencia de tria sus la relacion botanica e literatura per Josiana Ubaud, e enfin un recitau dau còr de fremas Pantaï en còr, bailejat per Maria-Madalena Martinet que ja conéisson lo monde que va au concèrt de Tant que li siam. Nos encoratja ben que la Comuna ajude, e la collaboracion entre totei a l’Ostau de la cultura provençala es un carburant per avançar !

Mai aqueu rendètz-vos ara anuau, es que mena de monde a la lenga ?

Premier nos fa presents, e èstre vists e ausits aquò es important. Puei lo programa es mai chanut chasque an, ce que nos fa vèire coma serios per lo public e, òc, l’agantam ! L’an passat la conferencia de Pau Pèire a fa sala plena, que nos faliá refusar quasi de monde. Amé Josiana Ubaud siam ben segur de faire tant ben, que son biais es remirable. Enfin, sas, lo monde a enveja de dançar e d’escotar de cants en lenga nòstra, emai Pantaï en còr fa ben lo liame entre totei aquelei culturas d’alentorn de la Meditèrraneia, qu’avèm a vèire ensems.

Un còp acabada la setmana provençala, l’IEO ivernarà ?

Que non ! Lo resta de l’an segur es una escomessa d’acampar lo monde per d’iniciativas que, sas, siam aluenchats leis uns deis autres : entre Aurenja, Carpentras Leberon e Avinhon es pas tant aisat de se trobar sovent. Mai lei cors de lengas per adults se fan dins lei doas calandretas d’Aurenja e Vauriàs, la radiò dau licèu d’Aurenja marcha ben amé l’emission « as ben parlat... », e aquelei qu’an la DAB o que vòlon s’i interessar sus lo web pòdon escotar Radio Territoire Ventoux que, un còp per mes, li donam totei leis entresenhas sus l’actualitat culturala en provençau. Avèm agut la sospresa de l’ausir dins lei restaurants Mc Do figura te ! Una pratica nos l’a dich… Après, lo monde que vòu nos rejonher nos ajudarà a faire d’iniciativas encara mai interessantas. Lei convidam a venir !