Alidé Sans premiada per l'ARC de Catalonha

Alidé Sans, l'artista màger de la Val d'Aran èra anonciada coma nominada demieg tota una tiera de cantaires per lo prèmi de l'ARC (Associació Professional de Representants, Promotors i Mànagers de Catalunya), onte trobam totplen de marcas (Renfe, cervesas... ) e de collectivitats territoriala, que sa tòca es de « faire visible e valorisar l'industria de la musica en direct », e qu'es reservat ais artistas catalans, o que restan en Catalonha.

Puei sus lo perfieu Facebook de la cantarèla occitana descurbèm que fins finala l'a ganhat lo prèmi, per 2024, que s'i presentava dins la categoria « Melhora còla d'artista o grope de jazz, musica classica o tradicionala » amé d'autrei còlas talas coma Belén Bandera, Els Pescadors de l'Escala, e Marala.

Alidé Sans, tanben implicada dins la vida politica e sociala de l'Aran (es premiera cònsola de Bausen, son vilatge) es, entr'autreis artistas, acarada a de dificultats pròpris a la populacion montanharda : l'alunhament de totei lei luecs onte cantar, amé de despensas particularas, e una visebilitat mendra. Es ce que dich sus son facebook : « nòstra proposicion es pas la mai comoda per èstre programats, per de rasons de distancia, quilometres, oras, hotels e despensas non previstas... e bòrd que nòstre albom, Arraïtz se canta en occitan, lenga preciosa mai que la màger part dau public conéis pas. Per aquò regraci ben ben dos còps mai la jurada ! »

De seguir sei malhums sociaus en tot cas vesèm que despuei l'estiu passat Alide Sans desvolopa una activitat fòrça importanta au nivèu musicau, que li a pas una setmana amb aquela joina cantarèla sensa una presencia qu'es pas de crèire sus lo pontin de mai que d'una ciutat, tant en Espanha coma en França.

Son darrier albom, Arraïtz, es de descurbir, que fa, tant au pontin coma amé son clip, una bèla fusion entre musica tradicionala e ritmes de nòstre temps.