Lei Targas musicalas de Correns siguèron un succès

Aperaquí dos cents artistes, tant professionaus coma amators afogats, una trentena d’espectacles de bèla qualitat, amé de musicians venguts dei cinc partidas dau monde…Lei Targas musicalas de Correns (83) èron una bèla reussida entre 19 e 21 de mai passats.
 
2600 personas li son vengudas vèire e entendre una o mai que d’una proposicien artistica. E per Franck Tenaille, lo novèu baile artistic, aurà estat un chale de constatar que lo public èra au rendètz-vos, quasi coma l’an passat, aqueu dei vint ans, amé dos còps mai d’espectacles.

Cosmogonias e musicas dau monde, èra la tòca d’aquela edicien fòrça rica. Se rementaram segur dau chaman de Touva, Nikolay Oorzhak, o de l’univèrs dei Lhubac, o encara dei pigmeus Aka, sens oblidar l’esmovent recitau de Baltazar Montanaro, Grand petit animal, quand parla de la Guerra Granda, de fa tot bèu just un sègle….
 
A l’autona, lo Chantier, l’estrutura que proposta lei Targas, tornarà a organizar de residèncias d’artistes, puslèu consacradas au cant tradicionau d’Italia, e lo public li serà convidat.
 
Ne’n parlarem segur mai