L'Espanha politica a la crosiera dei camins

Pedro Sánchez, l'actuau president espanhòu veirà pas sa majoritat confortada après leis elecciens generalas espanhòlas qu'a vòugudas per se donar una majoritat franca.

L'escomessa de Sánchez s'acaba sus una cagada.
   

Amé 120 sètis, alòr que li en faudriá 176, mancarà pas d'opciens, mai deguna li podriá convenir.

Per pas faire escòrna a sei sostens industriaus, puslèu dins lo domèni de l'energia, lo PSOE voliá pas d'una aligança amé leis alternatius de gaucha d'Unido Podemos...Elei volián una lèi sus la pauretat energetica e una moderacien dei loguiers...Que lei "socialistas" refusavan amé l'ultima energia.

Muma am'un chanjament tactic, la majoria que podriá formar amé Podemos li donariá pas lo mejan de governar : 155 sèti e pas mai. 

Li faudriá adonc negociar amé lei partits independentistas bascs e catalans, e am'aquelei, après de mes de repressien, es dificile de va considerar...Aritmeticament li fariá pasmens una majoria amé lei 13 sèti d'Esquerra Republicana de Catalunya, lei 8 de Junts per Cat (lo  movament dau president catalan Puigdemont)e quauquei deputats nacionalistas bascs...mai sensa l'extrema gaucha de la CUP que ne'n vòudriá pas.

Maugrat que partejan la muma volontat de calhar l'independentisme catalan, es ben pauc probable de vèire lo PSOE e VOX pactar. En revenge un acòrd entre PSOE e Partido Popular "dins l'interés de la nacien" sembla pas tant impossible : lei dos son liberaus au nivèu economic, corruptibles, e partejan la muma volontat d'empachar lei Catalans de s'enanar dau Reiaume. Entre elei aurián 208 elegits. 

En revenge anar de cotria amé Ciudadanos seriá d'anar dins una carriera bòrnia...Lo partit "de centre", en veritat una formacien autoritàri liberticida, s'es espòutida, li resta plus que 10 deputats. Pas pron per ajudar Sánchez a demorar au poder.

L'aligança obligàtòria entre formaciens politicas, seriá ben sosprenent se podián se faire amé de movaments catalanistas que, segur, aurián de reclamar premier la liberacien desenant de tot plen de presoniers politics, puei d'èste assegurar de votar per l'independència d'un biais legau...

Aquò, seriá pas previst dins la genetica politica espanhòla...E lo movament inagantable Tsunami Democratic l'a ben entendut, que l'endeman deis elecciens generalas, a mandat totei lei Catalans a blocar l'autorota entre Espanha e França per tres jorns ! 

Es que lei Catalans sabon ja qu'aqueleis elecciens li menaràn pas de milhoraciens. Preferaràn ocupar lo terrenc.