Estrosi un president per totei segon eu

« Serai lo president qu’ajusta a la Lèi mai de democracia, que respècta seis engatjaments e aplica son programa ». Vaquí lei premiérei paraulas de Crestian Estrosi coma president de Regien Provença Aups e Còsta d’Azur, lo 18 decembre. Elegit amé 82 votz còntra 41, a recebut l’eissarpa sang e aur dei mans de Miqueu Vauzelle, son predecessor socialista, e subran a donat l’acolada a Joan-Glaudi Gaudin, son mentor dei Republicans, avans que de sarrar la man de Miqueu Vauzelle, a la demanda d’aqueu.
 
Segur que lo novèu president provençau a ben sotalinhat, per lo còup, ce que deviá ai votz de senèstra que li an permés de ganhar, lo 13 de decembre, en fàcia de Marion Marechal-Le Pen.
 
S’a poscut afirmar que seriá « lo president que velha a l’equitat entre lei territòris, despuei lei mai àutei valadas jusqu’ai mai doç de nòstrei ribas de mar »  s’es pereu engatjat, d’un biais mai espantant, a èstre «  lo president de la justícia sociala », mai tambèn de l’inovacien, la proteccien, « tant per nòstre territòri que per leis òmes e lei fremas que li vívon ».
 
President dau discors d’ultra drecha avans lo 6 decembre, s’èra vestit per partida deis abits idelogics de la senèstra puei. Un costuma d’arlequin que l’avenir dirà leu se pòu vestir una politica coerenta per lei sieis annadas a venir.