Counvivència fara de resistènci en Arle

Emé 18000 € en 2015, pièi 10000 € en 2016 lis ajudo regiounalo au festivau arlaten Convivència 2017 poudien èstre redusido coumo pèu de chagrin. E bèn noun ! Soun toutalamen estado avalido. « Sara zèro, e pas mai, pèr aquest estiéu, e pèr lis annado seguènto » que nous dis Joan Colomina, lou creatour, emé sa coumpagno Catarino, d’aquéu festenau di musico dóu mounde, ounte chasque an la musico óucitano avié la bello plaço.
 
I’avèn entendu en juliet passa Cylsee cantant Max Rouquette, l’an d’avans Guylaine Renaud la troubadouresso, e en 2015 lou Goulamask, que sucedissié ei Perigourdan dóu Talabast en 2014… De bèlli descuberto chasque cop, à cousta d’artisto di cinq partido dóu mounde. Venguèron especialamen de Mediterranèio, tant valourisado à l’ouro d’aro, per un Counsèu Regiounau qu’ anaquelis pamens soun expressioun scenico.
 
« Refusavon nòsti demando de rendès-vous despièi d’annado, e subran vaqui que nous an counvouca à Marsiho, per nous dire qu’èro acaba, pas mai ». E lou baile de Counvivència d’ajusta : « me pènsi, e èro di à mezza voce, que dóu tèms de Vauzelle, lis Arlaten èron esta proun servi ».

Es verai que d’assouciacioun arlatenco de culturo coumençon de vèire soun eisistènci rousigado coumo l’Association pour un Musée de la Résistance « que dison un proujèt feblàs ! mau-grat lou mounde saberu que ié porto pèiro », Voix Off, l’à-coustat dóu Festivau Internaciounau de Foutougrafìo,  o La Maison de la Vie Associative, que perde 15000 €. Tout parié emé l’Ensemble Vocal d’Arles que vei desparèisse 7000 € d’ajudo regiounalo… O la radio 3DFM….
 
Es pas pèr acò que Convivència plegara li maleto e Joan Colomina a pensa la seguido en fourmo de resistèncio poupulàri. Aquelo passo à l’ouro d’aro, e pèr un moumen, pèr la plato-formo Hello Asso, ounte se pòu douna d’arbiho pèr sousteni un festenau que se debanara toujour sus sièis jour, dóu 9 au 14 de juliet 2018, sempre à la Plaço Leon Blum d’Arle.
 
« Emé la plato-formo es tambèn poussible d’aderi qu’avèn besoun de soustèn. S’agis de dire au mounde que, quand dounon, aquéu festivau vèn soun festivau ». A l’ouro d’aro, es ansin, engavacha la clau de la culturo poupulàri emé qualita se pòu plus faire que pèr l’engajamen dirèit dóu brave mounde… que pamens deja pago d’impost pèr acò.

Aquelo campagno de doun e adesioun, pèr Joan Colomina, dèu assegura la subrevido de la manifestacioun dins un premié tèms, pièi soun desvouloupamen.
 
« N’en avèn pas encara acaba emé li prepausicioun artistico de qualita » que nous a di.
 
A vèire à la primo venènto se la demarcho a capita o s’èro de cambo lasso . « I’a uno bello envejo dóu mounde pèr se retrouba davans uno scèno ounte crèbo l’iòu uno musico chanudo, e foro dis estandard dóu coumèrci musicau » vòu crèire Joan Colomina.