La ribiero souteirano que vèn de la Santo Baumo e desbouco à la calanco de Port Miéu èro pas vuejo de vido. Tre 2003 lou bioulougisto Pèire Chevaldonné, esplourant la croto marino proche de Marsiho, ié remarcavo pamens dins lou rai de la teo eleitrico uno pichouno bèsti blanco e trelusènto, sènso iue que ié servirien de rèn dins aquéli founsour. “Pecaire ! Dins lis annado seguènto n’en avèn trouba rèn que de femello, adounc poudian pas parla d’espèci !” que counto aro lou bioulougisto.
Ero à dous quiloumètre de la ribo de mar, en aigo saumastro.
Despièi l’estiéu passa pamens es fa, la troubado d’un mascle cruvelu a prouva que l’espèci poudié se reproudurre. E dins la revisto Crustaceana l’a pouscu nouma Tethysbaena ledoyeri Pèire Chevaldonné. Es un cruvelu à part, que lou gènre di Thermosbaenacés n’en counto rèn que trento-sèt. E pèr tout dire es lou premié cop que se n’en trobo uno sus lou territòri francés.
Aquéli croto poudrien èstre visto coume un desert, mai ren serié mai faus ! Se ié rescontron d’espèci adatado, segur forço pau, mai pèr Tethysbaena que pòu s’alimenta rèn qu’emé de bacterìo troubado dins l’areno, ja i’an trouba un predatour, uno niero marino, elo tambèn bòrni, mai forço bono niflarello.