Un an après lei canhòtas dei nafrats de la revòuta

“L’integralitat dei fons de la canhòta, valent a dire un milion d’€uròs, a estat consumada, permetant lo sosten de 1276 agents nafrats...” Es en president de la Region Provença – que éu sona “Sud” - que Renaud Muselier aviá dubert aqueu dispositiu a mieg-janvier de 2019, per lei policiers, gendarmes e pompiers acarats ai gilets jaunes. Finalament aprofiecharà a tot policier sus lo territòri exagonau.

Aièr a anonciat la distribucien ultima d’aquela canhòta onte 50 000 donaires avián portat pèire “en favor dei fòrças de seguretat”. Se despartiràn en un milion “a destinacien dei nafrats”, 360 000 € per leis orfanèus de la Policia e Gendarmariá, quasi 75 000 € per lo seguit psiquologic, e quasi 28 000 € qu’a tocat lo prestatàri de la canhòta.

Lo jornalista David Dufresne a addicionat lei victimas d’aqueu movament naissut lo 17 novèmbre 2018 per contestar una aumentacien dei taxas de carburants, mai que lèu lèu s’èra mudat en un movament de lucha còntre leis efècts dau neò liberalisme.

Per eu li auriá agut onge mòrts e mai de 4 400 personas nafradas. La màger part dei mòrts siguèron tuats dins d’accidents de circulacien avans la fin 2018, quora lo movament s’èra premier tancat ai peatges d’autorotas.

Au premier d’octòbre passat li auriá agut 2 495 manifestants nafrats. Vintaquatre d’entr’elei an agut l’uelh crebat e cinc una man arrancada. Lo ministèri de l’Interior, de son costat, a comptat 1944 policiers nafrats, entr’elei quauquei gendarmes.

Sensa que siegon nafrats fisicament, fau comptar tanben lo monde que sabiá ren de la preson e que lei jutges an condemnat, mai que d’un còp sus lo solet testimòni de policiers: mila segon le web dau jornau Bastamag.

Li a agut de cas emblematics, tau coma aqueu dau boxaire Cristòu Dettinger. L’òme, per aparar una frema picada fòrt a tèrra per de policiers, a Paris, leis aviá fa se recular a còps de ponh. Lo tribunau l’aviá subran condemnat a trenta mes de preson, que detzavuit èron amé relambi. A l’ora d’ara viu au sieu am’un braçalet electronic. Mai a la condmenacien fau ajustar la suspension de son emplec per la Comuna d’Arpajon onte trabalhava au netitge dei carrieras. Per eu una canhòta tanben siguèt duberta per ajudar sa familha a pagar lei frais de Justicia. Mai lèu la platafòrma Leetchi l’aviá barrada. Adonc degun pòu encara tocar lei 128 000 € reçauputs. Fin qu’ara la Justicia refusa de la desblocar, e la platafòrma s’es vista atacada tanben per de donators.

Eric Drouet, l’un dei grand nafrats dei manifestaciens pereu aviá dubert una canhòta per lo monde manifestaire esclapats per lei cargas de fòrças policièras. Mai encara en avost, lei 150 000 € recampats èron blocats per la Justicia per rasons fiscalas. L’associacien Agora de Lutèce deuiá lei despartir avans la fin d’octòbre...L’error èra de ligar la canhòta an un còmpte particulier, aqueu de Drouet.

Mai segur es de sotalinhar que, se lei canhòtas en favor dei policiers siguèron francas de restancaments, aquelei dei gilets jaunes ne’n manquèron pas.