Leis aparicions marialas son leis aparicions de la Verge. Lo mòt sabent es « mariofania » (dau bòn !). Constiuisson en personas, dichas « vesentas » o « visionàrias », qu’afortisson d’aver siá vist, siá ausit, o lei dos, una frema que diguèt estre la Santa Verge, e de còps de li aver parlat tanben. De tot biais, un messatge de la Verge es totjorn implicat : una menaça sus lo monde, l'òrdre de pregar, de se convertir o de bastir una capèla mai que mai. Lorda e Fátima fan partidas dei mai famoses, au mens demieg aquelei reconeissudas per la glèisa catolica. Pasmens lo fenomèn es ancian e mai comun que se podriá creire...
D'aparicions, de « visions », de la Verge o autre, totjorn n'i aguèt. Basta de veire Joana d'Arc. Un estudi de tèxtes de l'atge mejan dona una idèia de 2160 racontes de « visions » o « aparicions » ren que sus Euròpa. Lo Diccionari deis Aparicions ne'n revèla 2400. Pas grand causa au siècle XVIII mai la tendéncia repren amb un centenat au siècle XIX e 400 au siècle XX. Siam pas qu'a la debuta dau siècle XXI e n'i a jà vint de signaladas e solament quauqueis unas « oficialisadas ». De tot biais son totei controversiadas, d'un costat coma de l'autre.
La Vierge Marie semble très au courant du problème posé par la diglossie en pays d'Oc...
Per la lenga ? Vivent en Bigòrra, Bernadette parla gascon que mèscla malaisidament de francés. Per designar la Verge diguèt totjorn « aquerò ». Maximin e Mélanie parlan una varianta dau vivaro-aupenc. Totei dos coneisson pas que quauquei mots de francés ausits d'un endrech a l'autre. Pas tròp d'informacion per Benoite mai segur qu'a l'epòca deviá parlar lo provençau aupenc mai que lo francés. E la Santa Verge segon elei ? Benoite rapòrta un testimoniatge entierament en francés. Bernadette declara «qu'em parlo en patouès et quem dits bous ». «Aquerò» parla gaire mai totjorn en gascon. Lo cas de la Salèta es fòrça mai interessant... L'aparicion supausada comença en francés e contunha en occitan quora realiza que leis enfants la comprenon pas. La Santa Verge sembla ben au corrent de la question de la diglossia en França au siècle XIX ! E un pauc mai de dètz ans mai tard, se vei qu'a compres la leiçon vist que subran parla gascon a Bernadette ! Mai seriosament, lo raconte deis aparicions depend de son narrator, e s'aqueu narrator parla autra causa que lo francés...